ނ. ނަރޫދޫ "އަމާޒު" ބޯޓުން ދަތުރުކުރި ހެނބަދޫގެ 7 މީހުންގެ ޓެސްޓުގެ ނަތީޖާ ނެގެޓިވްވެފައިވާ ކަމަށް ހެނބަދޫ ސިއްހީ މަރުކަޒުން ބުނެފިއެވެ.
ހެނބަދޫ ސިއްހީ މަރުކަޒުން ބުނީ މިއަދުގެ ވަގުތެއްގައި އެރަށުން ނެގި 7 ސާމްޕަލްގެ ނަތީޖާ ލިބިފައިވާ ކަމަށެވެ. އަދި ﷲގެ އިރާދަފުޅުން 7 މީހުންގެ ނަތީޖާ ނެގެޓިވްވެފައިވާ ކަމަށް ސިއްހީ މަރުކަޒުން ބުންޏެވެ.
ހެނބަދޫން 7 މީހެއްގެ ސާމްޕަލް ނެގީ އަމާޒު ބޯޓުގެ ކެޕްޓަން އާއި އެކު ނަރޫދޫއިން 9 މީހަކު ކޮވިޑް-19އަށް ޕޮޒިޓިވްވުމާއި ގުޅިގެންނެވެ.
ހެނބަދޫ ސިއްހީ މަރުކަޒުން ބުނީ 7 މީހުންގެ ސާމްޕަލް ނެގެޓިވްވި ނަމަވެސް އަދިވެސް އެރަށް އޮތީ މޮނިޓަރިންގެ ހާލަތުގައި ކަމަށެވެ. އަދި ރަށުން މިހާތަނަށް ހުމާއި ރޯގާގެ އަސަރު ހުރި މީހަކު ފެނިފައި ނުވާކަމަށެވެ.
ނެޝަނަލް އިމެޖެންސީ އޮޕަރޭޝަން ސެންޓަރ (އެންއީއޯސީ)އިން ބުނީ އަމާޒު ބޯޓު ކޭސް އާއި ގުޅިގެން ކޮންޓެކްޓު ޓްރޭސިންގެ ތެރެއިން 113 މީހަކު ދެނެގެނެވިފައިވާ އިރު އޭގެ ތެރެއިން 35 މީހަކީ ހައި ރިސްކު މީހުން ކަމަށެވެ. މި މީހުންގެ ތެރެއިން 11 މީހެއްގެ ކިބައިން ހުމުގެ އަސަރު ފެނިފައިވާ އިރު ޕޮޒިޓިވްވި ނުވަ މީހުންނަކީ އޭގެ ތެރެއިން މީހުންނެވެ.