ކޮވިޑް19 އާއި ގުޅިގެން ސަރުކާރުން ގެނައުމަށް ނިންމާފައިވާ ވެންޓިލޭޓަރުތަކާއި ގުޅޭ މައްސަލާގައި ކޮރަޕްޝަނަށް މަގުފަހިވާ ގޮތަށް ހެލްތު މިނިސްޓްރީން އަމަލު ކޮށްފައިވާ ކަމަށް ގިނަ ބަޔަކު ބުނަމުން އަންނައިރު އެ މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ބަލަމުން އަންނަ ކަމަށް އެ ކޮމިޝަނުގެ ރައީސާ މަރިޔަމް ޝިއުނާ ވިދާޅުވެއްޖެއެވެ.
އެކަމަނާ މިފަދައިން ވިދާޅުވެފައި ވަނީ ރޭ ބޭއްވި މިނިވަން މުއައްސަސާތަކުގެ ކޮމެޓީގައި މެންބަރަކު ކުރެއްވި ސުވާލަކަށް ޖަވާބު ދެއްވައެވެ. ވެންޓިލޭޓަރުތަކާއި ގުޅޭ ގޮތުން ޝިއުނާ ވިދާޅުވީ އެ މައްސަލައަކީ އޭސީސީ ތަހުގީގު ކުރަމުން އަންނަ މައްސަލައެއް ކަމަށެވެ. ނަމަވެސް މިހާތަނަށް އެއްވެސް ތަފްސީލެއް އެކަމުގައި ހާމަކޮށްފައި ނުވާނެ ކަމަށް ޝިއުނާ ވިދާޅުވިއެވެ. ވެންޓިލޭޓަރުތަކާއި ގުޅޭ ހުރިހާ މައުލޫމާތު ކަރުދާހެއް އެ ކޮމިޝަނަށް ލިބިފައިވާ ކަމަށް އެކަމަނާ ފާހަގަކުރެއްވިއެވެ.
"މިވަގުތު އަޅުގަނޑަށް ދަންނަވަން އުނދަގޫ އަދި މީގައި އިސްލާހު ކުރަން ޖެހެނީ ކޮން ކަންތައްތަކެއްތޯ ނޫނީ މީގައި ކަނޑައެޅިގެން މިހާރުވެސް ކޮރަޕްޝަންގެ އަމަލުތަކެއް ހުރިތޯ. އެހެން މިވަގުތު އަޅުގަނޑަށް ދަންނަވަން ދަތި،" ޝިއުނާ
ވެންޓިލޭޓަރުތަކާއި ގުޅިގެން މައްޗަށްގޮޅި ދެކުނު ދާއިރާގެ މެންބަރު އަހުމަދު ހައިތަމް ހެލްތު މިނިސްޓަރު އަބްދުﷲ އަމީނާއި ކުރެއްވި ސުވާލުތަކަށް ލިޔުމުން ޖަވާބު ދެއްވާ މިނިސްޓަރު ވިދާޅުވެފައި ވަނީ ރުކާރުން ގެނައުމަށް ނިންމާފައިވާ 200 ވެންޓިލޭޓަރުގެ ތެރެއިން މި މަހުގެ ތެރޭގައި 38 ވެންޓިލޭޓަރު ގެނެވޭނެ ކަމަށެވެ.
އަމީން ވިދާޅުވީ ވެންޓިލޭޓަރުތައް އެންމެ ފުރަތަމަ ގެނައުމަށް ހަވާލުކުރީ އެސްޓީއޯ، މެޑްޓެކް އަދި ނާޑް ކިޔާ ކުންފުންޏަކަށް ކަމަށެވެ. އެ ތިން ކުންފުންޏަކީ ވެސް ހެލްތު މިނިސްޓްރީއަށް މީގެކުރިންވެސް ސިއްހީ ސާމާނުތައް ސަޕްލައި ކޮށްދީފައިވާ ކުންފުނިތައް ކަމަށް އަމީން ފާހަގަކުރެއްވިއެވެ.
އަމީން ވިދާޅުވީ ވެންޓިލޭޓަރުތައް އަވަހަށް ހޯދަން ބޭނުންވާތީ ސިންގަލް ސޯސް ޕްރޮކިއުމަންޓުގެ ދަށުން ދެ ކުންފުންޏަކަށް ހަވާލުކޮށްފައިވާ ކަމަށް އަމީން ވިދާޅުވިއެވެ. އޭނާ ވިދާޅުވީ އެ ދެ ކުންފުންޏަކީ މެޑްޓެކް އާއި ނާޑް ކަމަށެވެ.
އެހެންނަމަވެސް ވެންޓިލޭޓަރުތައް ގެނައުމުގައި ދަތިތަކެއް ކުރިމަތިވި ކަމަށާއި އެންމެ ބޮޑު ދައްޗަކީ ވެންޓިލޭޓަރުތައް އުފައްދާ ގައުމުތައް ލޮކްޑައުން ކޮށްފައި އޮތުމުން ކަމަށް އަމީން ވިދާޅުވިއެވެ. އަދި އެއީ ކޯޓޭޝަން ހޯދި އިރު، ކުންފުނިތަކުން އުންމީދު ކުރި ގޮތެއް ނޫން ކަން ކުންފުނިތަކުން ވަނީ އަންގާފައި ކަމަށް އަމީން ވިދާޅުވިއެވެ.
އަމީން ވިދާޅުވި ގޮތުގައި ކުންފުނިތަކުން ވެންޓިލޭޓަރުތަކުގެ އަގު ދައްކާފައިވާ އިރު، ވެންޓިލޭޓަރު މެނިފެކްޗަ އަތުން ލިބުމާއި ސަޕްލައި ކުރުމުގައި ދަތިތަކެއް ހުރުމުން އެކަމުގެ މައުލޫމާތު މިނިސްޓްރީ އަށް ދިނުމުން، މިނިސްޓްރީން ކުންފުނިތަކާއި ބައްދަލުކޮށް އަވަސް ގޮތެއްގައި ތަކެތި ސަޕްލައި ކުރެވޭނެ ގޮތްތަކަކީ ކޮބައިތޯ އޮޅުން ފިލުވައި އެކަންކަން ހައްލު ކުރުމަށް ކުރެވޭނެ ކަންކަމާ މެދު މަޝްވަރާކޮށް ކުންފުނިތަކުން އެދުނު ލިޔުންތައް ފޯރުކޮށްދީފައިވާ ކަމަށެވެ.