މިއަހަރު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބު ކޮވިޑް19 ގެ ސަބަބުން ނުބޭއްވުމުގެ ސަބަބުން ކައުންސިލަރުންގެ ދައުރު ދަންމާލުމަށް މަޖިލީހަށް ހުށަހަޅާފައި ބިލު ގާނޫނުއަސާސީއާ ހިލާފު ކަމަށް ރައްޔިތުން މަޖިލީހުގެ އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވިދާޅުވެއްޖެއެވެ.
ހެންވޭރު ހުޅަނގު ދާއިރާގެ މެންބަރު ހަސަން ލަތީފް ހުށަހެޅުއްވި އެ ބިލަކީ މިހާރު ހިނގަމުންދާ ކައުންސިލުގެ ދައުރު އަންނަ ޖޫން މަހުގެ ތިންވަނަ ދުވަހު ހަމަވާތީ އެކަމަށް ހައްލެއް ގެނެސް ދިނުމަށް ހުށަހެޅި ބިލެކެވެ.
އެ ބިލުގައި ބުނެފައިވަނީ މިހާރު ތިބި ކައުންސިލަރުން އައު ކައުންސިލެއް އިންތިހާބު ކުރެވެންދެން މަގާމުގައި ދެމި ތިބޭނެ ކަމަށެވެ. އެގޮތަށް އެކަން ނިންމީ ކައުންސިލް އިންތިހާބު ބާއްވަންޖެހޭ ދުވަހު ނުބޭއްވުމުގެ ސަބަބުން މިހާރު ތިބި ކައުންސިލަރުންގެ ދައުރު ހަމަވެ ގާނޫނީ ހުސްކަމަކަށް އެ މަގާމުތައް ދާނެތީއެވެ.
އޭގައިވާ ގޮތުން މިހާރު ހިނގަމުންދާ ކައުންސިލްތަކަކީ ގާނޫނުއަސާސީ އާއި ގާނޫނުގައިވާ ގޮތުގެ މަތިން އިންތިހާބުކޮށްފައިވާ ކައުންސިލްތަކަށްވާ އިރު، ގާނޫނީ ހުސްކަމެއް ކުރިމަތިނުވެ، ގާނޫނުއަސާސީން ލާޒިމް ކުރާ ގޮތުގެ މަތިން ލާމަރުކަޒީ އުސޫލުން އިދާރީ ދާއިރާތައް ހިންގޭނީ ލޯކަލް ކައުންސިލްތަކުގެ އިންތިހާބު ބޭއްވި، އާ ކައުންސިލްތައް އިންތިހާބުވުމާ ހަމައަށް މިހާރު ހިނގަމުންދާ ކައުންސިލްތައް ދެމިއޮވެގެން ކަމަށް ވެސް އެ ބިލްގައި ވަނީ ބުނެފައެވެ.
އެ ބިލުގައި އިތުރަށް ބުނެފައިވަނީ އެ މުއްދަތުގައި ކައުންސިލްތަކުން ނިންމާ ނިންމުންތަކަކީ ގާނޫނުއަސާސީއާ ގާނޫނުތަކުގައިވާ ގޮތުން މަތިން ފުރިހަމަ ބާރުވެރިކަން ލިބިގެން ނިންމާ ނިންމުންތަކެއް ކަމަށެވެ.
އެކަމާއި ގުޅިގެން މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ރޮޒެއިނާ ވިދާޅުވީ ސިމްޕަލް މެޖޯރިޓީއަކުން ފާސްކުރާ ގާނޫނަކުން ގާނޫނު އަސާސީގައި ދައުރެއްގެ މުއްދަތު ބަދަލު ކުރުމަކީ ވެސް ނަތީޖާ ގޯސް ވާނެ ކަމަށް ގަބޫލުކުރައްވާ ކަމަށެވެ. އޭނާ ވިދާޅުވީ ގާނޫނުއަސާސީ އިސްލާހު ނުކުރުމުގެ މަޖިލީހުން ކަނޑައެޅޭ ގާނޫނަކުން ގާނޫނުއަސާސީއާ ދެކޮޅު ހެދުމަކީ އޭގެ މާނަ ކަމަށް ގަބޫލު ނުކުރައްވާ ކަމަށެވެ.
"މިހެން މި ދަންނަވާ ސަބަބަކީ، ކަނޑައެޅިގެން ގާނޫނުއަސާސީގައި ތިން އަހަރު ކަމަށް ލިޔެވިފައި އޮއްވާ، ސިމްޕަލް މެޖޯރިޓީ އަކުން ފާސްކުރާ ގާނޫނަކުން އަޅުގަނޑުމެންނަށް އެ މުއްދަތު ބަދަލުނުކޮށް އެ މުއްދަތު އިތުރެއް ނުކުރެވޭނެ ކަމަށް އަޅުގަނޑަށް ގަބޫލު ކުރެވެނީ،" ރޮޒެއިނާ ވިދާޅުވިއެވެ.
މިއަދުގެ ޖަލްސާގައި ރޮޒެއިނާ ވަނީ މެންބަރުންނަށް ސުވާލެއް ކުރިމަތި ކުރައްވާފައެވެ. ވިދާޅުވީ ކޮވިޑް19 ގެ ހާލަތު ދިގު ދެމިގެންދާނީ ކޮން ދުވަހަކަށް ކިހާ ދުވަހަކަށް ކަމެއް ނޭނގޭއިރު މި މުއްދަތު އަދިވެސް އިތުރުވެގެން ހަމަ ހިނގައިދާނެ ކަމަށެވެ. އެ ހާލަތުގައިވެސް މެންބަރުން ގާނޫނުއަސާސީ އިސްލާހު ނުކޮށް ތިބޭނީތޯ ރޮޒެއިނާ ސުވާލު ކުރެއްވިއެވެ.