ރާއްޖެއިން އަނެއްކާވެސް އިތުރު 6 މީހަކު ކޮވިޑް19 އަށް ޕޮޒިޓިވްވެއްޖެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
އެޗްޕީއޭ އިން ކޮށްފައިވާ ޓްވީޓެއްގައި ބުނީ ރާއްޖެއިން 10 މީހަކު ކޮވިޑް19 އަށް ޕޮޒިޓިވްވެފައިވާ ކަމަށެވެ. ނަމަވެސް 10 މީހަކު ޕޮޒިޓިވްވެފައިވާއިރު
އޭގެތެރެއިން ހަތަރު މީހުންނަކީ ކުރިން ޕޮޒިޓިވްވެފައިވާ ކަމަށް އިއުލާން ކޮށްފައިވާ ހަތަރު މީހުންނެވެ. އެހެންކަމުން ފަހުން ޕޮޒިޓިވްވެފައި މިވަނީ 6 މީހެކެވެ.
މިއަދު މީގެކުރިން 14 މީހަކުވެސް މި ބައްޔަށް ޕޮޒިޓިވްވިއެވެ. އެހެންކަމުން މިއަދު އެކަނިވެސް ކޮވިޑް19 އަށް 24 މީހަކު ވަނީ ޕޮޒިޓިވްވެފައެވެ. އަދި މުޅި ޖުމްލަ ރާއްޖެއިން މިވަނީ 551 މީހަކު މި ބައްޔަށް ޕޮޒިޓިވްވެފައެވެ.
ރާއްޖެއިން މި ބައްޔަށް ފަރުވާ ހޯދަމުން ދިޔަ 18 މީހަކު ވަނީ ބަލިން ރަނގަޅުވެސް ވެފައެވެ. މީގެއިތުރުން 83 އަހަރުގެ މީހަކު މި ބަލީގައި ނިޔާވެސް ވެފައެވެ.