"ކޮވިޑް19 ގެ އެހީތެރިކަމުގެ ބިލް"ގެ ނަމުގައި މާވަށު ދާއިރާގެ މެމްބަރު މުހައްމަދު ސައީދު މަޖިލީހަށް ހުށަހަޅެއްވި ބިލު އެޖެންޑާއެއް ނުކުރިއެވެ.
އެ ބިލު އެޖެންޑާ ނުކުރީ ގަވާއިދަށް ވެސް ނުފެތޭތީ ކަމަށް ބުނެއެވެ. އެ ބިލާއި ގުޅޭ ގޮތުން ދައުލަތުގެ ވާހަކަދައްކަވަމުން މަޖިލިސް ރައީސް، ރައީސް މުހައްމަދު ނަޝީދު ވިދާޅުވީ ސައީދު ހުށަހެޅުއްވި ބިލުގައި ދިވެހި މާލިއްޔާއަށް އަސަރު ކުރުވާ މާއްދާތަކެއް އެބަހުރި ކަމަށެވެ. އެހެންކަމުން ނަޝީދު ވަނީ އަލުން އެ ބިލު އިސްލާހު ކުރުމަށްފަހު ހުށަހެޅުމަށް އެދިފައެވެ.
މަޖިލީހުގެ ގަވާއިދުގައި ބުނެފައިވަނީ ދައުލަތުން ޓެކުހެއް ނަގަން ޖެހޭ ނުވަތަ ރައްޔިތުންގެ އަތުން އިތުރު ފައިސާއެއް ނަގަން ޖެހޭނެ ނުވަތަ ދައުލަތުގެ މާލިއްޔަތުން ސީދާ ގޮތުން އެއްވެސް ފަރާތަކަށް ފައިސާއެއް ދޭން ޖެހިދާނެ ކަމެއް ނުވަތަ އުނި އިތުރެއް ގެންނަން ޖެހިދާނެ ކަމެއް ހިމެނޭ އެއްވެސް ބިލެއް ހުށަހެޅޭނީ ސަރުކާރަށް އެކަނި ކަމަށެވެ.
ސައީދުގެ ބިލު އަލުން ހުށަހަޅަން ބުނީ އެ ބިލުގައި އެފަދަ ކަންކަން ނުވަތަ މާއްދާތައް ހިމެނޭތީ ކަމަށް ރައީސް ނަޝީދު ވަނީ ވިދާޅުވެފައެވެ. އެ މާއްދާތައް އިސްލާހު ކުރުމުން މަޖިލީހަށް ބިލު ހުށަހެޅިދާނެ ކަމަށް ނަޝީދު ވިދާޅުވިއެވެ.
ސައީދު ވަނީ ނަޝީދުގެ އެ ވާހަކަތަކާއި ދެކޮޅު ހައްދަވާފައެވެ. ވިދާޅުވީ މިއީ މަޖިލީހުގެ ގަވާއިދުގައި ބުނެފައިވާ ހާލަތެއް ނޫން ކަމަށެވެ. އަދި މިއީ މުޅިން ހާއްސަ ހާލަތެއް ކަމަށް އޭނާ ވިދާޅުވިއެވެ.