އަންހެނުންގެ ތަރައްގީއާ ޒުވާނުންގެ ކުރިއެރުމަށް ކުރީގެ ރައީސް މުހައްމަދު އަމީނުގެ ދަރިކަނބަލުން އަންނަބީލާ އަމީނާ މުހައްމަދު އަމީން ކުރެއްވި މަސައްކަތް ދިވެހި ގައުމު ދުވަހަކުވެސް ހަނދާން ނެތިގެން ނުދާނެ ކަމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
އަމީނާ އަވަހާރަވީ އާލަސްކަންފުޅާއި އުޅުއްވަނިކޮށް މިއަދުގެ ވަގުތެއްގައެވެ. އެކަމާއި ގުޅިގެން ރައްޔިތުން މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ރައީސް ނަޝީދު ވިދާޅުވީ ރާއްޖޭގެ ތަރައްގީގެ އެކި ކަންކަމުގައި އަމީނާ އަދާކުރައްވާފައިވާ ދައުރު ދިވެހި އުއްމަތް ދުވަހަކުވެސް ހަނދާން ނުނެތޭނެ ކަމަށެވެ.
އަމީނާގެ ހަޔާތްޕުޅުގެ މައްޗަށް އަލިއަޅުއްވާލައްވާ ނަޝީދު ވިދާޅުވީ މުހައްމަދު އަމީންގެ ކިބައިން ރާއްޖޭގެ ރައީސުލްޖުމްހޫރިއްޔާކަން ނެގިގެން ދިޔައިރު އަމީނާ ހުންނެވީ ލަންކާގައި ކިޔަވާ ވިދާޅުވާން ކަމަށެވެ. އަމީނާ ރާއްޖެ ވަޑައިގެންނެވިއިރު ރައީސް މުހައްމަދު އަމީން ހަވަރަށް ދެވި ގާފަރަށް ފޮނުވާލެވި، ގާފަރުގައި އޮންނަވައި ހާލުކޮޅު ދަށްވެ ވިހަމަނާފުށްޓަށް ބޭސްފަރުވާއަށް ގެންދެވުނު ކަމަށް ނަޝީދު ވިދާޅުވިއެވެ.
އަމީނާ މުހައްމަދު އަމީން ވަނީ ދެ ދައުރެއްގައި ރައްޔިތުންގެ މަޖިލީހުގެ މެންބަރުކަންވެސް ކުރައްވައިފައެވެ. އަމީނާ އަވަހާރަވި އިރު އުމުރުފުޅަކީ 85 އަހަރެވެ. އަމީނާ އަވަހާރަވީ އިރު ދުނިޔޭގައި ފިރިކަލަކާއި، 4 ބޭފުޅުން އެބަތިއްބެވެ. އަމީނާ ވަނީ ރައްޔިތުންމަޖިލީހުގެ މެންބަރުކަން ވެސް ކުރައްވާފައެވެ.