ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީ) އަށް ފޮނުވާފައިވާ ތިން ސިޓީން ކުރެ އެއްވެސް ސިޓީއަކަށް ޖަވާބެއް ދެއްވާފައި ނުވާތީ އެ ތިން ސިޓީގެ ޖަވާބު އަވަސްކޮށްދެއްވުން އެދި އިދިކޮޅު ޕްރޮގްރެސިވް ކޯލިޝަނުން އެ ކޮމިޝަނުގައި އެދިއްޖެއެވެ.
އެޗްއާރްސީއެމްގެ ރައީސާ އަފްފާޟިލާ އާމިނަތު އީނާސް އަށް އެ ކޯލިޝަނުން ފޮނުވި ސިޓީއެއްގައި ބުނީ ކުރީގެ ރައީސުލްޖުމްހޫރިއްޔާ، މިހާރު އިދިކޮޅުގައި ހުންނެވި ސިޔާސީ ހަމައެކަނި ލީޑަރު، ރައީސް ޢަބްދުﷲ ޔާމީން ޢަބްދުލްޤައްޔޫމް ޖަލުގައި ބަންދުކުރެވިފައި ވަނީ އެމަނިކުފާނަށް ޤާނޫނީ ގޮތުން ލިބިވަޑައިގަންނަވާ ޤާނޫނީ އެއްވެސް ޙައްޤެއް ލިބިވަޑައިގަތުމެއްނެތި، އާބިޓެރަރީކޮށް ކަމަށެވެ.
ރައީސް އަބްދުﷲ ޔާމީން ޢަބްދުލްޤައްޔޫމަށް ލިބިވަޑައިގަންނަވާ ކަފާލާތުގެ ފުރުޞަތު ދެއްވާފައި ނުވާއިރު، އެމަނިކުފާނުގެ ފަރާތްޕުޅުން ހައިކޯޓުގައި އިސްތިޢުނާފް ކުރެވިފައިވާ މައްސަލަ ވެސް ކުރިއަށް ނުގެންގޮސް އެތައް މަހެއް ވަނީ ފާއިތުވެގެން ގޮސްފައި ކަމަށާއި ހަމައެހެންމެ އަނިޔާވެރިކަމާއެކު ނުޙައްޤުން ބަންދުކުރެވިފައިވާ ކުރީގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމަށް އަނިޔާވެރިނުވެ، އިހުސާންތެރިކަމާއެކު އެމަނިކުފާނުގެ ސިއްޙީ ހާލުކޮޅުށް ރިޢާއަތް ކުރެއްވުމާއެކު ރަމަޟާން މަހަށް އެމަނިކުފާނު ގެއަށް ބަދަލުކޮށް ދިނުމަށްވެސް ސަރުކާރުގައި އެދެމުން ދިޔަ ނަމަވެސް އެކަމަށްވެސް އިޖާބަ ދެއްވާފައި ނުވާ ކަމަށް އިދިކޮޅުން އެޗްއާރްސީއެމް އަށް ފޮނުވި ސިޓީގައި ބުނެފައިވެއެވެ.
ވީމާ، މިކަންކަން ބެއްލެވުމާއެކު، އެސިޓީއާއި ޙަވާލާ ދީފައިވާ ސިޓީން އެދިފައިވާ ގޮތަށް ރައީސް ޢަބްދުﷲ ޔާމީން ޢަބްދުލްޤައްޔޫމްގެ ސިއްޙީ ހާލުކޮޅަށް ރިޢާއަތް ކުރައްވާ އެމަނިކުފާނު ގެއަށް ބަދަލުކޮށްދެއްވުމަށް ބާރު އަޅުއްވާ މަސައްކަތްކޮށްދެއްވުމަށް ތަކުރާރުކޮށް ދެންނެވީމެވެ. ހަމައެއާއެކު، ރައީސް ޢަބްދުﷲ ޔާމިން ޢަބްދުލްޤައްޔޫމްގެ ފަރާތްޕުޅުން ހައިކޯޓުގައި އިސްތިޢުނާފް ކުރައްވާފައިވާ މައްސަލަ އަވަސްކޮށްދެއްވުމަށްވެސް މަސައްކަތްކޮށްދެއްވުމަށް އެދޭ
އެދުންވެސް ތަކުރާރު ކުރަމެވެ،" އިދިކޮޅު ބަޔާނުގައިވެއެވެ.
އިދިކޮޅު ކޯލިޝަނުން ވަނީ ތަކުރާރުކޮށް ރައީސް އަބްދުﷲ ޔާމީން ގެއަށް ބަދަލު ކޮށްދިނުމަށް ކަމާ ގުޅުންހުރި އިދާރާތަކުގައި އެދެމުންނެވެ. ނަމަވެސް މިހާތަނަށް އެއްވެސް ޖަވާބެއް އެ ކޯލިޝަނަށް އެއްވެސް ރަސްމީ ފަރާތަކުން ލިބިފައެއް ނުވެއެވެ.