އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް)އަށް ވިހަން ގެންދިޔަ މާބަނޑު އަންހެނަކު ކޮވިޑް-19 އަށް ޕޮޒިޓިވްވެއްޖެއެވެ.
މާބަނޑު އަންހެން މީހާ ކޮވިޑް-19 އަށް ޕޮޒިޓިވްވި ކަން އެނގުނީ އައިޖީއެމްއެޗުން މިހާރު ހަމަޖައްސާފައިވާ އުސޫލުގެ ތެރެއިން އެތަނުގައި އެޑްމިޑް ކުރާ މީހުން ކޮވިޑަށް ޓެސްޓު ކުރުމުން ނަތީޖާ ޕޮޒިޓިވްވުމުންނެވެ.
މިއަދުވެސް ރާއްޖެއިން ކޮވިޑް-19 އަށް 44 މީހަކު ޕޮޒިޓިވްވެފައިވާ އިރު މިއަންހެން މީހާ ހިމެނެނީ މިއަދު ޕޮޒިޓިވްވި މީހުންގެ ތެރޭގައެވެ.
މި މީހާ މިހާރުވަނީ ކޮވިޑް-19ގެ ބަލި މީހުންނަށް ފަރުވާ ދިނުމަށް ހާއްސަ ކުރެވިފައިވާ ޓްރީ ޓޮޕަށް ބަދަލުކޮށްފައެވެ.
މީގެ ކުރިންވެސް ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ތެރޭގައި މާބަނޑު އަންހެނަކު ހިމެނެއެވެ. އެއީ ށ. ނަރުދޫން ޕޮޒިޓިވްވި އަންހެނެކެވެ.
ރާއްޖޭން މިހާތަނަށް 618 މީހަކަށް ކޮވިޑް-19 ޖެހިފައިވާ އިރު 2 މީހަކު ވަނީ ބަލީގައި މަރުވެފައެެވެ. އަދި 20 މީހަކު ވަނީ ބަލިން ރަނގަޅުވެފައެވެ.