ފިލި އެންމެން ހޯދައި، ފުލުހުންގެ ބެލުމުގެ ދަށައް!

ހެރެތެރެ ރިސޯޓުގައި ކަރަންޓީނުކޮށްފައިވަނިކޮށް ފިލި 5 މީހުންވެސް ހޯދައި، ފުލުހުންގެ ބެލުމުގެ ދަށައް ގެންގޮސްފިއެވެ.

ފުލުހުން ބުނީ ފިލި 5 މީހުންގެ ތެރެއިން 3 މީހަކު ރޭ އިރާކޮޅު އަތުލައިގެންފައިވާ ކަމަށާއި، ބާކީ ދެމީހުން އަތުލައިގެންފައިވަނީ ރޭ ފަތިހުގެ ވަގުތެއްގައި ކަމަށެވެ.

ހެރެތެރެ ރިސޯޓުގައި ކަރަންޓީނު ކުރެވިފައިވަނިކޮށް ފިލި މީހުންނަކީ ޖަލުން ދޫކޮށްލާފައިވާ މީހުންގެ ތެރެއިން ބަޔެކެވެ. މި މީހުން އައްޑޫއަށް ގެނެސްފައިވަނީ މި މަހުގެ 5 ވަނަ ދުވަހުއެވެ.

ކޮވިޑް-19 އާއި ގުޅިގެން މާލެއިން އައްޑޫ އަދި ފުވައްމުލަކަށް އަންނަ މީހުން ކަރަންޓީނު ކުރުމަށް ހަމަޖެހިފައިވަނީ ހެރެތެރެ ރިސޯޓުގައެވެ. މިހާރުވެސް މިތަނުގައި 92 މީހަކު ވަނީ ކަރަންޓީނުކޮށްފައެވެ.