ރާއްޖޭގައި ތިބި އިންޑިއާގެ 200 މީހުން ބަލާ އެގައުމުން ފޮނުވި މަނަވަރު ރާއްޖޭގައި މިއަދު ބަނދަރުކޮށްފިއެވެ.
ރާއްޖޭގައި ހުންނަ އިންޑިއާ ހައިކޮމިޝަނުން ބުނީ މިއީ ރާއްޖޭގައި ތިބި އިންޑިއާ ރައްޔިތުންގެ ތެރެއިން އެނބުރި ގައުމަށް ދާން ބޭނުން މީހުން ފޮނުވުމަށް ކުރާ މަސައްކަތުގެ ފުރަތަމަ ފިޔަވަހީގެ ދަށުން އައި މަނަވަރެއް ކަމަށެވެ.
#INSJalashwa entering Male' port for the 1st phase under Operation #SamudraSetu to repatriate Indians from Maldives.@MEAIndia @DrSJaishankar @harshvshringla @indiannavy pic.twitter.com/D7r8lUrJxf
— India in Maldives (@HCIMaldives) May 7, 2020
އިންޑިއާގެ ހައި ކޮމިޝަނާ ހަވާލާދީ އިންޑިއާގެ ނޫސްތަކުގައި މީގެކުރިން ރިޕޯޓު ކޮށްފައިވާ ގޮތުގައި ކޮވިޑް19އާ ގުޅިގެން ރާއްޖެ އާއި އިންޑިއާއިން ވެސް އަޅާފައިވާ ފިޔަވަޅުތަކާ ގުޅިގެން ކުރިއަށް އޮތް ހަފްތާއެއްގެ ތެރޭގައި ރާއްޖޭގައި ތިބި އިންޑިއާގެ 200 މީހުން ބަލައި ބޯޓެއް ހަމަޖައްސަމުން އަންނަ ކަމަށެވެ.
އެ ބޯޓު ދިއުމަށް ހަމަޖެހިފައިވަނީ އިންޑިއާގެ ކޮޗިން އަށެވެ. އެމީހުންގެ ސްޓޭޓް ނުވަތަ ސިޓީތަކަށް ދިއުމުގެ ހުއްދަ ދެވޭނީ ކޮޗިންގައި އެމީހުން 14 ދުވަހުގެ ކަރަންޓީނެއް ކުރުމަށްފަހުއެވެ.
ރާއްޖޭގައި ތާށިވެފައި ތިބި އިންޑިއާގެ މީހުން ބަލައި އަންނަ ބޯޓުން ޖާގަ ދިނުމުގައި އިސްކަންދޭނީ ހައި ކޮމިޝަންގައި ރަޖިސްޓްރީ ކޮށްފައި ތިބި މީހުންގެ ތެރެއިން ސިއްހީ މައްސަލަތައް ހުންނަ މީހުންނާއި މާބަނޑު މީހުންނާއި އުމުރުން ދުވަސްވީ މީހުންނަށް ކަމަށް ހައިކޮމިޝަނާއި ހަވާލާދީ އިންޑިއާގެ ނޫސްތަކުން ބުނެފައިވެއެވެ. މީގެއިތުރުން ރާއްޖޭގައި ވަޒީފާ އަދާ ކުރަމުން ދިޔަ އިންޑިއާ ރައްޔިތުންގެ ތެރެއިން މިވަގުތު ވަޒީފާ ގެއްލިފައި ތިބި މީހުންނަށް ވެސް އިސްކަން ދޭނެ ކަމަށް ބުނެފައިވެއެވެ.