ބޭންކް އޮފް މޯލްޑިވްސް (ބީއެމްއެލް) އިން ދޭ ރިލީފް ލޯނުގެ ތެރެއިން 70 މިލިއަން ރުފިޔާގެ ލޯނު ދޫކޮށްފައިވާ ކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.
ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ފިނޭންސް މިނިސްޓަރު ވިދާޅުވީ ރިކަވަރީ ލޯނު ސްކީމް ރިލީފް ފަންޑުގެ ތެރެއިން 51 ލޯނަކަށް 70 މިލިޔަން ރުފިޔާ ބޭންކް އޮފް މޯލްޑިވްސްއިން ދޫކޮށްފައިވާ ކަމަށެވެ.
އިކޮނޮމިކް މިނިސްތަރު ފައްޔާޒު އިސްމާއީލް ވިދާޅުވީ އެސްއެމްއީ ބޭންކުން ހުޅުވާލި ފުރުސަތުގައި މިހާތަނަށް 1167 ލޯނު އެޕްލިކޭޝަން ލިބިފައިވާ ކަމަށެވެ. އޭގެ ތެރޭގައި ހިމެނެނީ ވިޔަފާރިތަކުން ހުށަހަޅާފައިވާ 764 އެޕްލިކޭޝަނާއި އަމިއްލަ މަސައްކަތްކުރާ މީހުންގެ 403 އެޕްލިކޭޝަން އެވެ އޭގެ ތެރެއިން މިއަދާ ހަމައަށް ފައިސާ ދޫކުރެވިފައި ވަނީ 38 ލޯނަކަށް ކަމަށާއި އަދި އެޕްރޫވް ކުރެވިފައި އޮތީ 263 އެޕްލިކޭޝަން ކަމަށް މިނިސްޓަރު ވިދާލުވިއެއެވެ.
ފައްޔާޒު ވިދާޅުވީ 57 ލޯނު އެޕްލިކޭޝަން ވަނީ ރިޖެކްޓު ކުރެވިފައިވާ ކަމަށާއި އަދި މިހާތަނަށް ޕްރޮސެސް ކުރެވިފައިވަނީ 25 ޕަސެންޓް އެޕްލިކޭޝަން ކަމަށް ވެސް މިނިސްޓަރު ފައްޔާޒު ވިދާޅުވިއެވެ.
މިކަމުގައި ލަސްތަކެއް އުޅެނީ އެސްއެމްއީ ބޭންކުގެ އިސްވެރިންނާއި އަދި މިކަމުގައި މަސައްކަތް ކުރާ މުވައްޒަފުން ސެލްފް އައިސޮލޭޝަން އަށް ދާން ޖެހުމުން ކަމަށް އޭނާ ވިދާޅުވިއެވެ.