ނުހުއްޓުވިއްޖެނަމަ، ކޮރޯނާވައިރަސް ފެތުރުމުގެ ސަބަބުން ފުރަތަމަ އަހަރުގައި އެފްރިކާ ބައްރުގައި 24 މިލިއަނާއި 44 މިލިއަނާއި ދެމެދުގެ އަދަދެއްގެ މީހުންނަށް ބަލިޖެހި، 83،000 އާއި 190،000 ދެމެދުގެ އަދަދަކަށް މީހުން މަރުވުމުގެ ފުރުސަތު އެބައޮތްކަމަށް ދުނިޔޭގެ ސިއްހަތު ޖަމްޢިއްޔާ (ޑަބްލިއު.އެޗް.އޯ) އިން ދީފިއެވެ.
އެގޮތުން އެޖަމްޢިއްޔާއިން ހާމަކުރާ ގޮތުގައި ރައްކާތެރިކަމުގެ ފިޔަވަޅެއް ނޭޅިއްޖެ ނަމަ، 3.6 މިލިއަނާއި 5.5 މިލިއަނާއި ދެމެދުގެ އަދަދަކަށް ކޯވިޑް-19 ޖެހިގެން މީހުން އެޑްމިޓް ކުރަން ޖެހޭނެ ކަމަށާއި، އޭގެތެރެއިން 82،000 އާއި 167،000 އާއި ދެމެދުގެ އަދަދަކަށް އޮކްސިޖަން ދޭން ޖެހޭ ސީރިއަސް ކޭސްތައް ފެނިގެން ދިޔުމުގެ އިތުރުން، 52،000 އާއި 107،000 އާއި ދެމެދުގެ އަދަދަކަށް ނޭވާލާން އެހީ ބޭނުންވާ މީހުންގެ ކޭސްތައް ފެނިގެންދާނެ ކަމަށް އެ ދިރާސާއިން ބުނެއެވެ. އަދި ރޮއިޓާސް ދެ ދިރާސާއަކުން ބުރާސްފަތި ދުވަހު ދެއްކި ގޮތުގައި އެފްރިކާގެ ކޮންމެ 100،000 މީހަކަށް ހުންނަނީ އެންމެ އައިސީޔޫ އެނދަކާއި ވެންޓިލޭޓަރެކެވެ.
މި އަދަދު ތަކަކީ އެފްރިކާ ބައްރުގައި އެއްވެސް ވަރަކަށް ބަލި ފެތުރުން ހުއްޓުވުމަށް ފިޔަވަޅު ނާޅައިފިނަމަ ލިބޭނެ ނަތީޖާކަން، އެ ބައްރައް ޚާއްސަކޮށްގެން ޑަބްލިއު.އެޗް.އޯ އިން ހިންގި ދިރާސާއަކުން ދައްކާފައިވާކަން ހާމަކޮށް، އެ ޖަމްޢިއްޔާގެ އެފްރިކާ ހެޑް، މަޓްޝިޑިސޯ މޮއެޓީ ބުނި ގޮތުގައި، ދިރާސާއިން މިގޮތަށް ދެއްކި ނަމަވެސް، ކަން ދިމާކުރި ގޮތުން ބަލި ފެތުރުން ހުއްޓުވުމަށް އެޤައުމުގައި ވަނީ ފިޔަވަޅުތަކެއް އެޅިފައެވެ. އެގޮތުން ވައިރަސް ފެތުރުން ހުއްޓުވުމުގެ ގޮތުން އެބައްރުގެ ގިނަ ޤައުމުތަކުން ވަނީ ޢާންމު ތަންތަނަށް އެއްވުމާއި، ޤައުމުން ބޭރަށް ފުރުން މަނާ ކުރުމުގެ އިތުރުން ކާފިއުވެސް ވަނީ އިއުލާންކޮށްފައެވެ.
ޑަބްލިއު.އެޗް.އޯ އިން ހާމަކުރި ގޮތުގައި، މިވައިރަސް އެހެން ޤައުމުތަކަށް ވުރެ ލަހުން އެފްރިކާގެ ސަރަހައްދުތަކަށް ފޯރި ނަމަވެސް، އަދި ބަލި ފެތުރޭ މިންވަރުވެސް އެެހެން ޤައުމުތަކާއި އަޅާބަލާއިރު މަދު ނަމަވެސް، މި ބަލި ފެތުރިއްޖެ ނަމަ އަހަރުތަކަކަށް މިކަން ދެމިގެން ދިޔުން އެކަށީގެންވެއެވެ.
"މި ސަރަހައްދުގެ އެކި ޤައުމުތަކުން މިކަމަށް އަވަސް ފިޔަވަޅުތަކެއް ނާޅައިފިނަމަ، ކުރިއަށް އޮތް އަހަރުތަކުގައި އަހަރެމެންގެ ދިރިއުޅުމުގެ ހިއްސާއަކަށް ކޯވިޑް-19 ވުން އެކަށީގެންވޭ. އަހަރެމެން އެބަ ޖެހޭ ޓެސްޓުކޮށް، ޓްރޭސްކޮށް، އައިސޮލޭޓު ކުރުމަށްފަހު ފަރުވާދޭން." މޮއެޓީ ހާމަ ކުރިއެވެ.
ޑަބްލިއު.އެޗް.އޯ އެފްރިކާ ސަރަހައްދުގެ ސަރަހައްދުގެ ކުދި ޤައުމުތަކާއި، އަލްޖީރިއާ، ދެކުނު އެފްރިކާ އަދި ކެމެރޫންފަދަ ޤައުމުތަކަށް ބޮޑެތި އަސަރު ކުރުން އެކަށީގެންވާކަމަށް އެ ޖަމްޢިއްޔާއިން ވަނީ ފާހަގަކޮށްފައެވެ. ނަމަވެސް ޑަބްލިއު.އެޗް.އޯ އެފްރިކާގެ ސަރަހައްދުގައިވާ 47 ޤައުމުގެ ތެރޭގައި ޖިބޫޓީ، ސޫދާން، ސޯމާލިއާ، މިސްރު، ލީބިއާ، ޓިއުނީޝިއާ އާއި މޮރޮކޯ ނުހިމެނޭތީ، މިޤައުމުތައް މި ދިރާސާގައި ނުހިމެނެއެވެ.
ޑަބްލިއު.އެޗް.އޯ އާއި ސަރުކާރުގެ ބަޔާން ތަކާއި ހަވާލާދީ ރޮއިޓާސްގައި ހާމަކޮށްފައިވާ ގޮތުން، ޖީއެމްޓީ ގަޑިން 1259 ވީއިރު މި 47 ޤައުމުންވަނީ 35,097 ކޮރޯނާވައިރަހުގެ ކޭސް ރިޕޯޓު ކުރެވި 1،231 މީހުން މަރުވެފައެވެ.