ރޭ އައްޑޫ އިން މާލެ ފޮނުވި މީހަކު ކޮވިޑް-19 އަށް ޕޮސިޓިވް ވެފައިވާއިރު އޭނާއަށް ޒިޔާރަތް ކުރުމަށް ގިނަ ބަޔަކު ގަވާއިދާ ޚިލާފަށް ވަދެފައިވާ ކަމަށް އައްޑޫ އިކުއެޓޯރިއަލް ހޮސްޕިޓަލްގެ މެނޭޖަރ ޝަރަފުއްސާދަތު ވިދާޅުވެއްޖެއެވެ.
މިއަދު އައްޑޫ އެންއޯއީސީ އިން ބޭއްވި ޕްރެސް ކޮންފަރެންސެއްގައި ސާތު ވިދާޅުވީ ބަލި މީހާއަށް ޒިޔާރަތް ކުރުން މަދުކުރުމަށް ހޮސްޕިޓަލުން މަސައްކަތް ކުރި ނަމަވެސް ހޮސްޕިޓަލްގެ އެންގުމާ ޚިލާފަށް ގިނަ ބަޔަކު އައިސީޔޫއަށް ވެސް ވަދެފައިވާ ކަމަށެވެ.
އަދި އޭނާ ފުރުވުމަށް ވެސް ގިނަ ބަޔަކު އެއާޕޯޓަށް ގޮސްފައިވާ ކަމަށް މައުލޫމާތު ލިބެމުން އަންނަ ކަމަށް އޭނާ ވިދާޅުވިއެވެ.
ޕޮސިޓިވްވި މީހާއާ ޖުމުލަ 26 މީހަކު ބައްދަލުވެފައިވާ ކަމަށް ސާތު ވިދާޅުވެފައިވާއިރު އޭގެ ތެރޭގައި 7 ޑޮކްޓަރަކާއި 10 ނަރުހުންގެ އިތުރުން މާލެ ގެނައުމުގައި މަސައްކަތް ކުރި މީހުން ހިމެނޭ ކަމަށެވެ.