އައްޑޫގައި ކޮވިޑް-19ގެ ކޮމިއުނިޓީ ސްޕެރެޑެއް އޮތްކަމަށް ގަބޫލު ކުރެވޭކަމަށް އައްޑޫގެ މޭޔަރ އަބްދުﷲ ސޯދިގު (ސޯބެ) ވިދާޅުވެއްޖެއެވެ.
އައްޑޫ އިން މިއަދު ކޮވިޑަށް މީހަކު ޕޮޒިޓިވް ވެފައިވާއިރު އެމީހާއަކީ ހާޓްއެޓޭކެއް ޖެހިގެން އައްޑޫ އިކުއިޓޯރިއަލް ހޮސްޕިޓަލަށް ގެނައުމަށް ފަހު އިތުރު ފަރުވާއަށް މާލެ ގެންދިޔަ މީހެކެވެ. އޭނާ ކޮވިޑް-19 އަށް ޕޮޒިޓިވްވި ކަން އެނގުނީ ފަރުވާއަށް އައިޖީއެމްއެޗަށް ގެންދާ މީހުން ކޮވިޑް-19 އަށް ޓެސްޓު ކުރުމަށް ހަމަޖެހިފައިވާ އުސޫލުން ހެދި ޓެސްޓު ޕޮޒިޓިވްވުމާއި ގުޅިގެންނެވެ.
ބައްޔަށް ޕޮޒިޓިވްވި މީހާ އަކީ މާޗް 10 ވަނަ ދުވަހު އައްޑޫއަށް ރިސޯޓަކުން އައި މަރަދޫފޭދޫ މީހެކެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ސޯބެ ވިދާޅުވީ ބައްޔަށް ޕޮޒިޓިވްވި މީހަކު އައްޑޫން ފެނިފައިމިވަނީ، އައްޑޫގައި ބަލިމަޑުކަން އޮތްކަން އެނގިފައި ނުވާ ދަނޑިވަޅެއްގައި ކަމަށާއި، މީގެއިން ވެސް ކޮމިއުނިޓީ ސްޕްރެޑް އޮތް ވަރު ހާމަވާ ކަމަށެވެ.
އަދި އެމީހާ އަށް ބަލި ޖެހުނީ އައްޑޫންތޯ ނުވަތަ އެމީހާ އައްޑޫ އަށް އައިރުވެސް ބަލި ޖެހިފައި ހުރިކަން ވެސް އެނގެން ނެތްއިރު، ޑޮކްޓަރުން ވިދާޅުވާ ވާހަކަތަކަށް ބަލާއިރު ކޮންމެވެސް ވަރެއްގެ ކޮމިއުނިޓީ ސްޕްރެޑެއް އޮތް ކަމަށް ގަބޫލުކުރައްވާ ކަމަށްވެސް ސޯބެ ވިދާޅުވިއެވެ.
"ކޮމިއުނިޓީ ސްޕްރެޑެއް ނެތް ކަމަކަށް އަޅުގަނޑެއް ގަބޫލެއް ނުކުރާނަން. ގަބޫލު ކުރެވެނީ ކޮމިއުނިޓީ ސްޕްރެޑެއް އޮވެގެން ކަމަށް މިހެން ވާން މިޖެހެނީ" ސޯބެ ވިދާޅުވިއެވެ.
ކޮމިއުނިޓީ ސްޕްރެޑެއް އައްޑޫގައި އޮތް ކަމަށް ބެލެވޭތީ ފަރުވާކުޑަ ނުކުރުމަށް މީގެކުރިން ވެސް ދެންނެވި ކަމަށާއި، ނަމަވެސް ތަންކޮޅެއް ލުއިގޮތަކަށް މީހުންނަށް މިކަން ނެގިފައި އޮތީ އައްޑޫން ބަލި ފެނިފައިނުވާތީ ކަމަށް ބެލެވޭ ކަމަށްވެސް ސޯބެ ވިދާޅުވިއެވެ. ނަމަވެސް މިއަދު ޕޮޒިޓިވް ކޭސްއެއް އައްޑޫން ފެނުމުން ފަރުދީ ޒިންމާ އޭގެ އެންމެ ހަރުދަނާ ގޮތުގައި ކުރުމަށް ވެސް ސޯބެ ވަނީ އިލްތިމާސްކުރައްވާފައެވެ.
އައްޑޫން ޕޮޒިޓިވް ކޭސްއެއް ފެނުމާއެކު ދެން ފިޔަވަޅުތައް އިތުރަށް ވަރުގަދަކުރާނެ ކަމަށްވެސް ސޯބެ ވިދާޅުވިއެވެ. އެގޮތުން މިއަދުން ފެށިގެން ޒަރުޒީ ބޭނުންތަކުގައި ގެއިން ބޭރަށް ނިކުންނަންޖެހޭނީ ފުލުހުންގެ ހުއްދަޔާއެކުގައި ކަމަށާއި އެގޮތަށް އެކަން ނުކުރާ ފަރާތްތަކަށް ފިޔަވަޅު އަޅާނެކަން ފުލުހުން މިއަދު އަންގާފައިވާ ކަމަށްވެސް ސޯބެ ވިދާޅުވިއެވެ.
އަދި ޑެލިވަރީގެ ހިދުމަތުގައި އުޅޭ ފަރާތްތަކާއި އެހެނިހެން މަސައްކަތްތަކުގައި އުޅޭ ފަރާތްތަކުން ވެސް މާސްކު ފަދަ ތަކެތި ބޭނުން ކުރުމަށް ވެސް ސޯބެ ވަނީ އިލްތިމާސްކުރައްވާފައެވެ.