ރާއްޖެއިން ކޮވިޑް19 އަށް އިތުރު 22 މީހަކު ޕޮޒިޓިވްވެއްޖެއެވެ.
އެޗްޕީއޭ އިން ބުނީ 16 ބަންގްލަދޭޝް މީހުންނާއި ހަތަރު ދިވެހިންނާއި އިންޑިއާ އަދި ނޭޕާލް އަށް ނިސްބަތްވާ މީހަކު ކޮވިޑް19 އަށް މިއަދު ޕޮޒިޓިވްވެފައިވާ ކަމަށެވެ. މިއާއި އެކު މުޅި ރާއްޖެއިން ބަލި ޖެހުނު މީހުންގެ އަދަދު ވަނީ 766އަށް އަރާފައެވެ.
މާލެއިން ޕޮޒިޓިވްވާ މީހުންގެ އަދަދު އިތުރުވަމުންދާއިރު، ކުރިއަށް މިއޮތް ދެތިން ހަފުތާގެ ތެރޭގައި، މާލޭގައި ކޮވިޑް-19 ގެ ބަލީގެ ޙާލަތު، މިހާރަށް ވުރެ މައްޗަށް ދިޔުން އެކަށީގެންވާ ކަމެއް ކަމަށް ސިއްހީ ތަޖުރިބާކާރުން ބުނެއެވެ.
އެގޮތުން ރޭ ބޭއްވި ނޫސްވެރިންގެ ބައްދަލުވުމެއްގައި ޑރ.ޝީނާ ވިދާޅުވީ ކުރިއަށް ދެ ތިން ހަފްތާގެ ތެރޭގައި ފުދޭވަރަކަށް ވަރަށް ބޮޑު ސާޖެއް ފެނުމަކީ އެކަށީގެންވާ ކަމަށާއި އެގޮތުން އެ ސާޖް ޕީކަށް ދާނެ ކަމަށް ބެލެވެނީ މި މަހުގެ 31 ގައި ކަމަށެވެ.
"އެ ދުވަހު ގާތްގަނޑަކަށް 1600 އިންފެކްޝަން އުޅެދާނެ" ޑރ.ޝީނާ ވިދާޅުވިއެވެ.
އެންމެ ޕީކަށްދާ ދުވަހު 1600 ކޭސް އުޅުނު ނަމަވެސް ރާއްޖޭގެ މިހާރުގެ ޓެސްޓިން ކެޕޭސިޓީ އަށް އިތުރު ބަދަލެއް ނާންނަމަ އެ ދުވަހު އެންމެ ގިނަވަގެން ވެސް ފެންނާނެ ކަމަށް ބެލެވެނީ ގާތްގަނޑަކަށް 400 ކޭސް ކަމަށްވެސް ޝީނާ ވިދާޅުވިއެވެ.