އައިޖީއެމްއެޗުގެ ޑޮކްޓަރަކާއި ނަރުހެއް ކޮވިޑް19 އަށް ޕޮޒިޓިވްވެއްޖެއެވެ.
ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އައިޖީއެމްއެޗުގެ މެޑިކަލް ޑިރެކްޓަރު ޑރ. އަލީ ނަޒީމް ވިދާޅުވީ ކޮވިޑް19 އަށް ޕޮޒިޓިވްވި ޑޮކްޓަރާއި ނަރުހަށް އެ ބަލި ޖެހުނީ ހޮސްޕިޓަލުގައި މަސައްކަތް ކުރަމުން ދަނިކޮށް ނޫން ކަމަށެވެ. ނަޒީމް ވިދާޅުވީ މި ހާލަތުގައި ބަލީގެ ނުރައްކާތެރިކަން އެންމެ ބޮޑީ ފްރަންޓުލައިންގައި މަސައްކަތް ކުރާ ސިއްހީ ހިދުމަތްތެރިންނަށް ކަމަށެވެ.
އޭނާ ވިދާޅުވީ އައިޖީއެމްއެޗަށް ގެންދާ ބަލި މީހުން ކޮވިޑް19 އަށް ޓެސްޓު ކުރަނީ އެ ހޮސްޕިޓަލުގައި އޮންނަ އުސޫލުގެ ތެރެއިން ކަމަށެވެ. އަދި އެ ބައްޔަށް ޓެސްޓު ކުރާ ހޮސްޕިޓަލުގެ ޑޮކްޓަރުންނާއި ނަރުހުންނާއި އަދިވެސް އެހެން ޑިޕާޓުމަންޓުތަކުގައި މަސައްކަތް ކުރާ ޑޮކްޓަރުންނާއި ނަރުހުން ތިއްބަވާނީ ފުލް ކިޓުގައި ]ޕީޕީއީ[ ކަމަށެވެ.
މިހާތަނަށް 16 ނަރުހަކު އައިސޮލޭޓު ވުމަށް އަންގާފައިވާ ކަމަށާއި އެގޮތަށް އެންގީ ޓެކްނިކަލް އެޑްވައިޒަރީ ގްރޫޕު (ޓެގް) އަދި ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ލަފާގެ މަތިން ކަމަށް ނަޒީމް ވިދާޅުވިއެވެ. އޭނާ ވިދާޅުވީ އެއްފަހަރާ ގިނަ އަދަދެއްގެ ނަރުހުންތަކެއް އައިސޮލޭޝަނަށް ދިއުމަކީ ލިބިގެން ދިޔަ ވަރަށް ބޮޑު ގެއްލުމެއް ކަމަށެވެ. އަދި މިވަގުތު އެއްވެސް ނަރުހަކު [އައިސޮލޭޝަނަށް ގޮސްފައިވާ] ޕޮޒިޓިވްވެފައިވާ ނުވާ ކަމަށް ނަޒީމް ވިދާޅުވިއެވެ.
ރާއްޖެއިން މިއަދު ވެސް ވަނީ 22 މީހަކު ކޮވިޑް19 އަށް ޕޮޒިޓިވްވެފައެވެ. މީގެއިތުރުން އައްޑޫ ސިޓީން މާލެ ގެންދިޔަ ބަލި މީހަކުވެސް ވަނީ ކޮވިޑް19 އަށް ޕޮޒިޓިވްވެފައެވެ. އެއާއި އެކު އައްޑޫ ސިޓީ ވަނީ 14 ދުވަހަށް ލޮކްޑައުން ކޮށްފައެވެ. އަދިވެސް އެ ސިޓީގައި ވަނީ މިކަމާއި ގުޅިގެން ގިނަ ފިޔަވަޅުތަކެއް އަޅާފައެވެ.