އައްޑޫ ހޮސްޕިޓަލުގައި ބޭނުން ކުރާނެ މާސްކެއް ސެނެޓައިޒާއެއް ނެތް!

އައްޑޫން ކޮވިޑް-19 އަށް މީހަކު ޕޮޒިޓިވްވެފައިވާ އިރު އައްޑޫ އިކުއިޓޯރިއަލް ހޮސްޕިޓަލ (އޭއީއެޗް) އިން ފޭސް މާސްކާއި ސެނިޓައިޒާސް ހުސްވެއްޖެއެވެ.

"އައްޑޫލައިވް" އަށް އެނގިފައިވާ ގޮތުން ފޭސް މާސްކު އާއި ސެނިޓައިޒާސް ހުސްވެފައިވާ ކަން ހޮސްޕިޓަލުގެ ނަރުހުން ވަނީ ހޮސްޕިޓަލްގެ މެނޭޖްމަންޓުގެ ސަމާލުކަމަށް ގެނެސްފައެވެ.

މިކަމާއި ގުޅިގެން ނަރުހުން ވަނީ ވަރަށް ބޮޑަށް ކަންބޮޑުވުން ފާޅުކޮށްފައެވެ. އެގޮތުން އައްޑޫން ކޮވިޑް-19ގެ ކޭސް އެއް ފެނި އެންމެ ބޭނުންވީ އިރު މާސްކާއި ސެނެޓައިޒާސް ހުސްވެފައިވާތީ ނަރުހުން ވަނީ ކަންބޮޑުވުން ފާޅުކޮށްފައެވެ.

ހިތުގެ ބައްޔަށް ފަރުވާ ހޯދުމަށް އިއްޔެ ހެނދުނު އޭއީއެޗަށް ގެންދިޔަ ބަލި މީހަކު މިވަނީ ކޮވިޑް-19 އަށް ޕޮޒިޓިވްވެވެފައެވެ. މި ބަލި މީހާއަށް އައްޑޫ އިކުއިޓޯރިއަލް ހޮސްޕިޓަލުން ފަރުވާ ދިނުމުގައި ރައްކާތެރިކަމުގެ ގޮތުން އަޅަން ޖެހޭ ފިޔަވަޅު އަޅާފައި ނުވާކަމަށް ހޮސްޕިޓަލްގެ މެނޭޖަރ ޝަރަފު ސާދާތު މިއަދު ވަނީ ވިދާޅުވެފައެވެ.

ސާދާތު ވިދާޅުވީ ކޮވިޑް-19 އަށް ފަރުވާ ދިނުމުގައި ބޭނުން ކުރާނެ އެކަށީގެންވާ މިންވަރަށް ޕާސަނަލް ޕްރޮޓެކްޓިވް އިކްއިޕްމެންޓް (ޕީޕީއީ) ވެސް ނެތްކަމަށެވެ.

އައްޑޫ އިކުއިޓޯރިއަލް ހޮސްޕިޓަލުން ފޭސް މާސްކު އަދި ސެނިޓައިޒާ ހުސްވެފައިވާ އިރު އައްޑޫގެ ރަށްތަކުގެ ޓާސްކު ފޯސް އަދި އައްޑޫގެ ފުލުހުންގެ އަތުގައިވެސް ބޭނުންވާ މިންވަރަށް މާސްކު ނެތްކަމަށް ވަނީ މައުލޫމާތު ލިބިފައެވެ.

މިކަމާއި ގުޅޭގޮތުން ހޮސްޕިޓަލްގެ ބަހެއް ހޯދުމަށް މެނޭޖަރ ސާތު އަށް ގުޅުމުން މީޓިން އެއްގައި ހުންނެވުމުން ފޯނު ވަނީ ބިޒީ ކުރައްވާފައެވެ. އެހެންވެ ޖަވާބެއް ވަނީ ލިބޭގޮތް ނުވެފައެވެ.