ރާއްޖޭގައި ތިބި އަވަށްޓެރި ސްރީލަންކާގެ ރައްޔިތުންތަކެއް އެނބުރި ގައުމަށް ގެންގޮސްދީފިއެވެ.
މި މީހުން ގޮވައިގެން ސްރީލަންކަން އެއާލައިންސްގެ ބޯޓެއް ވެލާނާ އިންޓަނޭޝަނަލް އެއާޕޯޓުން މިއަދު ހެނދުނު ވަނީ ފުރާފައެވެ. އިއްވެސް ސްރީލަންކަން އިން ރާއްޖޭގައި ތިބި ޕާކިސްތާނާއި އިތުރު ބައެއް އެހެން ގައުމުތަކުގެ ރައްޔިތުންތަކެއް ލަންކާ އަށް ވަނީ ގެންގޮސްފައެވެ. އެގޮތުން 108 ބިދޭސީއަކު ރާއްޖެއިން ގެންގޮސްފައިވާ ކަމަށް ރިޕޯޓުތައް ބުނެއެވެ.
އެގައުމުގެ ނޫސްތަކުން ބުނާ ގޮތުގައި މިއަދުވެސް 300 އަށްވުރެ ގިނަ މީހުން ލަންކާއަށް ދާނެއެވެ. އެ ހުރިހާ އެންމެން ވެސް އެގައުމުގެ ސިފައިން ބަލަހައްޓާ ކަރަންޓީޏް ފެސިލިޓީއެއްގައި 14 ދުވަހު މަޑު ކުރާނެއެވެ.
މިހާތަނަށް ރާއްޖެއިން ކޮވިޑަށް ޕޮޒިޓިވްވި މީހުންގެ އަދަދު 955 އަށް އަރާފައިވާއިރު އެންމެ ގިނައިން ޕޮޒިޓިވްވެފައި ވަނި ބަންގްލަދޭޝް މީހުންނެވެ. ޕޮޒިޓިވްވި ބަންގްލަދޭޝް މީހުންގެ އަދަދު އުޅެނީ 506 ގައެވެ. ދިވެހިންގެ ތެރެއިން 316 މީހަކަށް ކޮވިޑް19 ވަނީ ޖެހިފައެވެ. އިންޑިއާގެ 98 މީހަކަށް ކޮވިޑް19 ވަނީ ޖެހިފައެވެ. ލަންކާ ރައްޔިތުންގެ ތެރެއިން މި ބަލި ރާއްޖެއިން ޖެހިފައިވަނީ 6 މީހަކަށެވެ.