ރާއްޖެއިން ކޮވިޑް19 ޖެހުނު މީހުންގެ ތެރޭގައި އެންމެ އިސް ސަފުގައި ހަރަކާތްތެރިވާ އޮފިސަރުންގެ ތެރެއިން 137 އޮފިސަރަކަށް ކޮވިޑް ޖެހިފައިވާ ކަމަށް ސަރުކާރުން ހާމަކޮށްފިއެވެ.
ރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި އައިޖީއެމްއެޗުގެ ޑޮކްޓަރު އިބްރާހީމް އިބްރާހީމް އަފްޒަލް ހިއްސާ ކުރައްވަމުން ގެންދެވި ގްރާފުތަކުން ފެންނަ ގޮތުގައި ޖުމްލަ 137 އޮފިސަރަކަށް ވަނީ ކޮވިޑް ޖެހިފައެވެ.
އެންމެ ގިނަ މީހުން ޕޮޒިޓިވްވެފައިވަނީ މި މަހުގެ 8ވަނަ ދުވަހުއެވެ. އެ ދުވަހު ޖުމްލަ 47 މީހަކު ޕޮޒިޓިވްވިއެވެ. މިދިޔަ މަހުގެ 29ވަނަ ދުވަހު 22 މީހަކު އަދި މިމަހުގެ 10ވަނަ ދުވަހު ފްރަންޓުލައިންގައި މަސައްކަތް ކުރާ 15 މީހަކަށް ވަނީ ކޮވިޑް ޖެހިފައެވެ.
މީގެތެރޭގައި ފުލުހުންނާއި ސިފައިންވެސް ހިމެނެއެވެ. އެހެންކަމުން ގައުމީ ސަލާމަތަށް ގުޅުންހުރި ކަމަކަށް ވާތީ ފުލުހުންނާއި ސިފައިންގެ ތެރެއިން ބަލި ޖެހުނު މީހުންގެ ޖުމްލަ އަދަދު ހާމައެއް ނުކުރެއެވެ.
މުޅި ރާއްޖެއިން ޖުމްލަ 955 މީހަކަށް މިހާތަނަށް ވަނީ ކޮވިޑް19 ޖެހިފައެވެ.