ކ. ކާށިދޫއިން ދަތުރު ކުރަމުން އައި "މިންވަރު" ނަމަަކަށް ކިޔާ ދޯންޏެއް ވެސްޓް ޕާކު ސަރަހައްދުގައިވާ ތޮށިގަނޑަށް އަރައިފިއެވެ.
އެމް.އެން.ޑީ.އެފުން މައުލޫމާތު ދީފައިވާ ގޮތުގައި މި ހާދިސާ ހިނގިކަމުގެ މަޢުލޫމާތު ލިބިފައިވަނީ މިއަދު މެންދުރު 1:00 ހާއިރެވެ. އިތުރަށް ހާމަކޮށްފައިވާ ގޮތުގައި، 4 މީހުންނާއެކު ދަތުރު ކުރަމުން ދިޔަ އެ ދޯނި ތޮށިގަނޑަށް އަރަން މެދުވެރިވީ ދޯނީގެ އިންޖީނު ހުއްޓިގެންނެވެ.
މަޢުލޫމާތު ލިބޭ ގޮތުގައި އެދޯނީގައި ހުރީ މާލެ ގެންދަން ހަމަޖެހިފައި ތިބި ކެއުމަށް ބޭނުން ކުރާ ބާވަތްތަކާއި މޭވާގެ ސާމާނެވެ. ދޯނިން ދޫވި ބައެއް ތަކެތި އޮޔާ ބެހެމުން ދާތީ އެމް.އެން.ޑީ.އެފުން ވަނީ މިސަރަހައްދުން ދަތުރުކުތާ ފަރާތްތަކުން މިތަކެއްޗަށް ސަމާލުވުމަށް އެދިފައެވެ.
މިހާދިސާ ހިނގާފައި މިވަނީ މުޅި ރާއްޖެއަށްވެސް ހުޅަނގު މޫސުމުގެ ވިއްސާރައާއި ގަދަވައިގެ އަސަރު ކުރަމުންދާ ދަނޑިވަޅެއްގައެވެ. އެގޮތުން، މޫސުމާއި ބެހޭ އިދާރާއިން ވަނީ ށ. އަތޮޅުން މ. އަތޮޅަށް ވަނީ ރީނދޫ އެލަރޓް ނެރެފައެވެ. އަދި ގއ. އަތޮޅުން އައްޑޫ ސިޓީ އަށް ވައިޓް އެލަރޓް ނެރެފައެވެ.
އެމް.އެންޑީ.އެފުން ދަނީ މިބޯޓަށް އެހީތެރިވަމުންނެވެ.