މަޤާމާއި ހަވާލު ވިތާ ހަފްތާ ތަކެއްގެ ތެރޭގައި ބްރެޒިލްގެ އާ ސިއްޙަތާ ބެހޭ ވަޒީރު، ނެލްސަން ޓީކޭ ހުކުރު ދުވަހު މަޤާމުން އިސްތިއުފާ ދެއްވައިފިއެވެ.
ނެލްސަންގެ އިސްތިއުފާއާއި އެކު އެޤައުމުގައި ހަލުވި ކަމާއެކު ފެތުރެމުންދާ ކޯވިޑް-19 ގެ ކަންކަން ރައީސް ޖައިރ ބޮލްސޮރާނޯއަށް އެންމެ ރަނގަޅަށް ހިންގޭކަމާމެދު އުފައްދަމުން އަންނަ ސުވާލުތަކަށް އިތުރު ހިތްވަރެއްވަނީ ލިބިގެން ގޮސްފައެވެ.
އެގޮތުން، މަޤާމާއި ހަވާލުވިތާ މަހެއްވެސް ނުވަނީސް ބޮލްސޮރާނޯގެ ދެވަނަ ސިއްޙަތާ ބެހޭ ވަޒީރުވެސް މަޤާމު ދޫކޮށްލުމުން ސިޔާސީ ފަރާތްތަކުގެ ފާޑު ކިޔުންތަކާއި، އޭނާ މަޤާމުން ދުރުކޮށްލުމަށް ގޮވާލާ ގޮވާލުންތަކުގެ އަޑު ވަނީ ގަދަވެގެން ގޮސްފައެވެ. އަދި ބަލީގެ އަސަރު ކޮށްފައިވާ ވަރު ބޮޑު ކަމުން ހޮސްޕިޓަލްތައް ފުރި ބާރު ވެފައިވާ ރިއޯ ޑެޖެނޭރިއޯ އާއި ސައު ޕައުލޯގެ ރައްޔިތުންވަނީ އެމީހުންގެ ކުޑަ ދޮރު ތަކާއި ހަމައަށް ނިކުމެ ތެލިތަކުގައި ތަޅައި، އަޑުގަދަކޮށް ނުރުހުން ފާޅުކޮށްފައެވެ.
ނެލްސަން މަޤާމުން އިސްތިއުފާ ދިން ސަބަބެއް ސީދާ ބަޔާން ނުކުރި ނަމަވެސް، ބެލެވޭ ގޮތުގައި އޭނާ މަޤާމު ދޫކޮށްލީ އެޤައުމުގެ އިޤްތިޞާދު އަލުން ހުޅުވުމަށާއި، މެލޭރިއާއަށް ފަރުވާ ކުރުމަށް ބޭނުން ކުރަމުންދާ ހައިޑްރޮކްސީކްލޮރޮކުއިން ބޭނުން ކުރުމަށް ނެލްސަން ބާރު ނޭޅުމުގެ ސަބަބުން، ރައީސް ބޮލްސޮރާނޯގެ ފާޑު ކިޔުންތައް ބޮޑުވެގެންނެވެ.
އެގޮތުން، ރައީސް ބޮލްސޮރާނޯ އަންގާފައިވާ ގޮތަށް ސްޓޭޓްތަކުގެ ސަރުކާރުތަކާއި މަޝްވަރާކޮށްގެން އިޤްތިޞާދު އަލުން ހުޅުވާލުމަށް ނެލްސަންވަނީ ނުކުޅެދިފައެވެ. އަދި ޖިމްތަކާއި، ސެލޫނުތަކާއި، ޕާލަރުތައް ހުޅުވުމުގެ ހުއްދަ ދީ، ރައީސް ދެއްކެވި ވާހަކަތަކާމެދު ނެލްސަން ވަނީ ނޫސްވެރިންގެ ބައްދަލުވުމެއްގައި ކަންބޮޑުވުން ފާޅުކޮށްފައެވެ.
ނަމަވެސް މަޤާމު ދޫކޮށްލުމުގެ އެންމެ ބޮޑު ސަބަބެއް ކަމުގައި ބެލެވެނީ، ކޯވިޑް-19 އަށް ފަރުވާ ދިނުމުގައި، މެލޭރިއާއަށް ފަރުވާ ކުރުމަށް ބޭނުން ކުރާ ބޭހެއް ކަމަށްވާ ހައިޑްރޮކްސީކްލޮރިކުއިން ބޭނުން ކުރުމަށް ރައީސް ބޮލްސޮރާނޯ ތަކުރާރުކޮށް އަންގަމުން ދިޔުމެވެ. ނެލްސަން އެބޭސް ބޭނުން ކުރުމަށް އެއްބަސް ވެފައި ނުވަނީ އެބޭހާއި ބެހޭ މާ ބޮޑު ތަހުލީލުތަކެއް ކުރެވިފައި ނުވާތީއެވެ.އެގޮތުން މި ބޭހަކީ ކޯވިޑް-19 އަށް ބޭސް ކުރުމުގައި މާ ބޮޑު ފަސޭހަތަކެއް ވާކަމަަށް ފެނިފައި ނުވާ، ބައެއް ހާލަތްތަކުގައި ބަލި އިތުރަށް ގޯސް ވުމަށް މެދުވެރި ކުރުވޭ ބޭހެއްކަން ވަނީ ހާމަވެފައެވެ. އަދި އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަނުންވެސް ވަނީ އެބޭސް ބޭނުން ނުކުރުމަށް ގޮވާލާފައެވެ.
ފާހަގަކޮށްލަން ޖެހޭކަމަކީ ބްރެޒިލްގެ ކުރީގެ ސިއްޙަތާއި ބެހޭ ވަޒީރު، ލުއިޒް މަންޑެޓާވެސް މަޤާމުން ދުރުކޮށްލެވުނީ ރައީސް ބޮލްސޮރާނޯގެ އެންގުމާއި ޚިލާފަށް ހައިޑްރޮކްސީކްލޮރޮކުއިން ބޭނުން ކުރުމަށް ބާރު ނޭޅުމުންކަމެވެ.
ނެލްސަން އިސްތިއުފާ ދީފައިވަނީ ބްރެޒިލްގައި ރިކޯޑު އަދަދަކަށް ކޯވިޑް-19ގެ ކޭސްތައް އެއް ދުވަހެއްގެ ތެރޭގައި ރިކޯޑު ކުރެވުނު ދުވަހުގެ ފަހު ދުވަހުއެވެ. އެގޮތުން، ބުރާސްފަތި ދުވަހާއި ހަމައަށް އެޤައުމުން 200،000 އަށް ވުރެ ގިނަ މީހުންނަށް ކޯވިޑް-19 ޖެހިފައިވާއިރު، އެދުވަހު އެކަނިވެސް 844 މީހުން ބައްޔަށް ޕޮޒިޓިވް ވިއެވެ. އަދި އެޤައުމުން މިބަލީގައިމިބަލީގައި މަރުވެފައިވާ މީހުންގެ އަދަދުވެސް ވަނީ 13،933 އަށް އަރާފައެވެ.
ނެލްސަންގެ އިސްތިއުފާއާއި އެކު، އެޤައުމުގެ ކެބިނެޓުގައި ތިބި އަސްކަރިއްޔާގެ މެމްބަރުން ދަނީ ސިއްހަތާއި ބެހޭ ވުޒާރާގެ ނައިބު ވަޒީރުކަން ކުރަމުން އަންނަ، އެޤައުމުގެ އަސްކަރިއްޔާގެ ޖެނެރަލްއެއްވެސް ކަމަށްވާ އެޑުއާރޑޯ ޕަޒުއެލޯއަށް ވަޒީރުކަން ހަވާލުކުރުމަށް ގޮވާލަމުންނެވެ.