އެމްބީސީގެ ޓީވީ މޯލްޑިވްސް އިން ކުރިއަށް ގެންދިޔަ ޤުރުއާން ކިޔެވުމުގެ މުބާރާތް "ދިވެހި ރާއްޖޭގެ އެންމެ އަލިގަދަ ތަރި"އަކަށް ސ. މަރަދޫފޭދޫ ލިލީމާގޭ ހުސައިން ޒާހިރު މިރޭ ހޮވިއްޖެ އެވެ.
ހިތަދޫ ޝަރަފުއްދީން ސްކޫލްގެ ޤުރުއާން މުދައްރިސެއްގެ މަގާމު އަދާ ކުރައްވަމުން އަންނަ ޒާހިރު، އޭނާ އާ ފައިނަލްގައި ވާދަ ކުރި އަނެއް ދެ ބައިވެރިން ކަމަށްވާ ރީހާން ވަހީދާއި ޝަމީމް ފައިސަލް އަހުމަދު ބަލި ކުރެއްވި އިރު، ޒާހިރަކީ، އިތުރު ޤާރީއެއްގެ އެހީތެރިކަމާ ނުލައި އަމިއްލަ އަށް މަސައްކަތް ކުރައްވައިގެން މުބާރާތް ކާމިޔާބް ކުރި ފަރާތް ވެސް މެ އެވެ.
އޮޑިޝަނުގައި ޖުމްލަ 270 މީހުން ބައިވެރިވެ މުބާރާތުގައި 12 ބައިވެރިން ވާދަ ކުރި އިރު، "ދިވެހި ރާއްޖޭގެ އެންމެ އަލިގަދަ ތަރި" ގެ ދެވަނަ އަށް ދިޔައީ ޝަހީމް އެވެ. ތިން ވަނަ އަށް ދިޔައީ ރީހާން އެވެ.
މުބާރާތުގެ ފަހުރުވެރި އެއް ވަނަ އާ އެކު ޒާހިރަށް ވަނީ ޓީވީއެމުންދޭ 100،000ރ. ގެ އިތުރުން ވެސް އަގު ބޮޑެތި ގިނަ އިނާމްތަކެއް ލިބިފަ އެވެ.
ޓީވީއެމުން ބުނީ މުޅި މުބާރާތަކީ ޖުމްލަ 1.3 މިލިއަން ރުފިޔާގެ އިނާމް ހުށަހެޅުނު ޕްރޮގްރާމެއް ކަމަށެވެ.
އަދި ރާއްޖޭގެ އެކި ސަރަހައްދުތައް ޒޯންތަކަށް ބަހާލައިގެން، އޮޑިޝަން ބާއްވައި އަންނަ އަހަރު ގެ ރޯދަ މަހު ވެސް މި މުބާރާތް ބާއްވާނެ ކަމަށް ޓީވީއެމުން ބުންޏެވެ.