މުވައްޒަފުންގެ މުސާރައިން ބައެއް އުނިކޮށް، އަލަށް ގެނެސްފައިވާ ބަދަލުތައް އާއްމުކޮށްފި

ދައުލަތުގެ މުވައްޒަފުންގެ މުސާރައިން ބައެއް އުނި ކުރުމަށްފަހު މުވައްޒަފުންގެ މުސާރަ އަށް އަލަށް ގެނެސްފައިވާ ބަދަލުތައް ފިނޭންސް މިނިސްޓްރީން އާއްމުކޮށްފިއެވެ.

ކޮވިޑް19 ގެ ސަބަބުން ދައުލަތުގެ ހަރަދުތައް ކުޑަ ކުރުމަށް ސަރުކާރުން ވަނީ މުވައްޒަފުންގެ މުސާރައިގެ އަސާސީ މުސާރައިން ބައެއް އުނި ކުރުމަށް ނިންމާފައެވެ. އެކަމާއި ގުޅޭ ގޮތުން ފިނޭންސް މިނިސްޓްރީން ރޭ ވަނީ ސާކިއުލާއެއް ނެރެފައެވެ. އެ ސާކިއުލާގައިު މުވައްޒަފުންގެ އަސާސީ މުސާރައިން އުނިކޮށްފައިވާ މިންވަރު ވަނީ ބަޔާންކޮށްފައެވެ.

އެގޮތުން އަސާސީ މުސާރައިގެ ގޮތުގައި 20،000 ރުފިޔާއިން ދަށުން މުސާރަ ލިބޭ މުވައްޒަފުންގެ މުސާރަ އަކަށް އެއްވެސް ބަދަލެއް ނާންނާނެއެވެ. ނަމަވެސް 20،000 ރުފިޔާއިން މަތިން އަސާސީ މުސާރަ ލިބޭ މުވައްޒަފުންގެ އަސާސީ މުސާރައިން 20 ޕަސެންޓު އުނި ކުރާނެ ކަމަށް ސާކިއުލާގައިވެއެވެ. އަސާސީ މުސާރައިގެ ގޮތުގައި 60،000 ރުފިޔާ އަށްވުރެ މަތިން މުސާރަ ލިބޭ މުވައްޒަފުންގެ އަސާސީ މުސާރައިން 35 ޕަސެންޓު އުނިކޮށްފައިވާ ކަމަށެވެ. އަސާސީ މުސާރައިގެ ގޮތުގައި 30،000 ރުފިޔާއާ 60،000 ރުފިޔާއާ ދެމެދުގެ އަދަދަކަށް މުސާރަ ލިބޭ މީހުންނަށް 30 ޕަސެންޓު އުނިކުރާނެ ކަމަށް ސާކިއުލާގައިވެއެވެ.

މިއާއިއެކު އެންމެ ބޮޑު މުސާރައެއް ލިބޭ މީހުންނަށްވެސް ގެއަށް ގެންދަން ލިބޭނީ ފިކްސްޑް ކޮށްފައިވާ އަދަދަދެކެވެ. އެގޮތުން 80،000 ރުފިޔާ އަށްވުރެ މަތިން މުސާރަ ލިބޭ މުވައްޒަފަކަށް ނުވަތަ ބޭފުޅަކަށް މިހާރުގެ ސާކިއުލާ ބުނާ ގޮތުން ގެއަށް ގެންދިއުމަށް ދެން ލިބޭނީ 70،000 ރުފިޔާއެވެ. އެއަށްވުރެ ގިނައިންނެއް ނުގެންދެވޭނެއެވެ.

އަސާސީ މުސާރައިގެ ގޮތުގައި 60،000 ރުފިޔާއާ 80،000 ރުފިޔާއާ ދެމެދު ލިބޭ މުވައްޒަފުންނަށް ގެއަށް ގެންދިއުމަށް 65،000 ރުފިޔާ ލިބޭނެ ކަމަށް ސާކިއުލާގައި ބުނެފައިވާއިރު އަސާސީ މުސާރައިގެ ގޮތުގައި 40،000 ރުފިޔާއާ 50،000 ރުފިޔާއާ ދެމެދުގެ އަދަދެއް ލިބޭ މުވައްޒަފުންނަށް ގެއަށް ގެންދަން ލިބޭނީ 55،000 ރުފިޔާއެވެ.

ފަންސާސްހާސް ރުފިޔާއާ 60،000 ރުފިޔާއާ ދެމެދުގެ އަސާސީ މުސާރަ ލިބޭ މުވައްޒަފުން ގެއަށް ގެންދިއުމަށް 60،000 ރުފިޔާ ލިބޭނެ ކަމަށް ފިނޭންސްގެ ސާކިއުލާގައި ބުނެފައިވެއެވެ. 25،000 ރުފިޔާއާ 30،000 ރުފިޔާއާ ދެމެދުގެ އަދަދަކަށް މުސާރަ ލިބޭ މީހުން ގެއަށް ގެންދިއުމަށް ލިބޭނީ 45،000 ރުފިޔާ ކަމަށެވެ. އަސާސީ މުސާރައިގެ ގޮތުގައި 30،000 ރުފިޔާއާ 40،000 ރުފިޔާއާ ދެމެދު ލިބޭ މުވައްޒަފުން ގެއަށް ގެންދަން ލިބޭނީ 50،000 ރުފިޔާއެވެ.