ގާނޫނީ ފަންނުގެ ގާނޫނުގައި ވަކީލުގެ ކަމުގެ ޝަރުތުގެ ގޮތުގައި ބަޔާންކޮށްފައިވާ ބާ އިމްތިހާނާއި އެއް އަހަރުގެ ތަމްރީނާއި ނުލާ ވަކީލު ކަމުގެ ހުއްދަ ދިނުމަށް ގާނޫނަށް އިސްލާހެއް ހުށަހަޅައިފިއެވެ.
ދަގެނތި ދާއިރާގެ މެންބަރު ކާނަލް ރިޓަޔާޑް މުހައްމަދު ނާޒިމް މިއަދު ކުރެއްވި ޓްވީޓެއްގައި ވިދާޅުވީ ކޮވިޑް19 ބައްޔާ ގުޅިގެން ގާނޫނީ ވަކީލުކަމުގެ ހުއްދަ ހޯދުމަށް ދަތިވެ ހުއްދަ ނުލިބުމުގެ ސަބަބުން އާމްދަނީ ހޯދުމަށް ގޮންޖެހުން ކުރިމަތިވެފައިވާ މީހުންނަށް އެކަމުގެ ހައްލު ހޯދައިދިނުމަށްޓަކައި، ދިވެހިރާއްޖޭގެ ގާނޫނީ ފަންނުގެ ގާނޫނަށް އިސްލާހެއް ހުށަހަޅާފައިވާ ކަމަށެވެ.
އެގޮތުން ގާނޫނީ ވަކީލުކަމުގެ ހުއްދަ ދޫކުރެވޭ ޝަރުތުތަކުގެ ތެރޭގައި ހިމެނޭ، ގާނޫނީ ހިދުމަތްދޭ ތަނެއްގައި އެއްއަހަރު ދުވަހުގެ ތަމްރީން ފުރިހަމަކުރުމާއި ބާ އިމްތިހާނު ފުރިހަމަ ކުރަންޖެހޭ ކަމަށްބުނެ ގާނޫނުގައި ބަޔާންކޮށްފައިވާ ދެ ޝަރުތަށް އަމަލުކުރުން 1 ޖެނުއަރީ 2021 ހަމަޔަށް ފަސްކުރުމަށް ނާޒިމް ވަނީ އިސްލާހެއް ހުށަހަޅާފައެވެ.
މިދިޔަ އަހަރުގެ ޖޫން މަހު ވުޖޫދުވި މި ގާނޫނަށް އަހަރެއްވާން ގާތްވަނީއެވެ. ނަމަވެސް ގާނޫނީ ވަކީލުންނަކަށް އަދިވެސް ގާނޫނުގައި އެބުނާ ފުރުސަތެއް ލިބޭ ގޮތެއް ނުވިއެވެ. އެތައް އަހަރެއް ވަންދެން ފޮނި އުއްމީދުތަކަކާއި އެކުގައި ކިޔެވި ކިޔެވުމަށް ބޭކާރު އެއް އަހަރު ހޭދަވަނީއެވެ. ވަކީލުންނަށް ކުރިމަތިވެފައިވާ އެންމެ ބޮޑު ގޮންޖެހުމަކީ އެއް އަހަރު ދުވަހުގެ ތަމްރީނު ޕްރޮގްރާމެއެވެ. ގާނޫނީ މަސައްކަތް ދައުލަތުން ކުރަމުން ގެންދަނީ އެންމެ ދެ މުއައްސަސާގައެވެ. އެއީ ޕްރޮސިކިއުޓާ ޖެނެރަލް އޮފީސް (ޕީޖީ) އަދި ބަންޑާރަ ނާއިބުގެ އޮފީހެވެ. މި ދެ އޮފީހުން ވެސް ތަމްރީން ޕްރޮގްރާމުތަކަށް ކަނޑައަޅާފައި ވަނީ އަހަރަކަށް ވަކި މިންވަރެކެވެ.
މި ތަމްރީން ޕްރޮގްރާމް ފުރިހަމަ ކުރެވެން އަންނަނީ ބާ ކައުންސިލުން ހުއްދަ ކުރާ ލޯ ފާމެއް ނުވަތަ ދައުލަތުގެ މުއައްސަސާއެއްގެ ސުޕަވައިޒަރެއްގެ ބެލުމުގެ ދަށުންނެވެ. އެ ސުޕަވައިޒަރުންނަކީ ވެސް ވަކީލު ކަމުގައި މަދުވެގެން ފަސް އަހަރު ދުވަހުގެ ތަޖުރިބާ ލިބިފައިވާ ބަޔަކަށް ވެގެން ނޫނީ އެކަމެއް ކުރެވޭ ގޮތެއް ނުވެއެވެ. ތަމްރީނު ފުރިހަމަ ކުރި ނަމަވެސް ބާ ކައުންސިލުން ދޭ އިމްތިހާނުވެސް އަދި އޮތީއެވެ.
ރަނގަޅު ފެންވަރެއްގެ ބާ އިމްތިހާނެއް ދިނުމަށްޓަކައި ބޭރުގެ ބާ އެސޯސިއޭޝަންތަކުގެ އެހީ ބާ ކައުންސިލުން ހޯދަމުން އަންނާތީ އެކަމަށް ބޭނުންވާ ދިރާސާތައް ކުރުމަށް ފަހު ބާ އިމްތިހާން އެކުލަވާލަން އަހަރެއްހާ ދުވަސް ނަގާނެ ކަމަށް ބެލެވެއެވެ. މީގެއިތުރުންވެސް ބާ ކައުންސިލަށް ދަތި އިތުރު ކަންކަން އެބަހުއްޓެވެ. އެއީ ބާ ކައުންސިލް ހިންގާނެ އޮފީހެއް ނެތުމާއި ބަޖެޓް ލިބުމުގައި ކުރިމަތިވާ ދަތިކަމެވެ.