މިދިޔަ ބުދަ އަދި ބުރާސްފަތި ދުވަހު އައްޑޫއަށް ކުރި ވިއްސާރާގައި މިހާތަނަށް 636 ގެއަކުން ގެއްލުންވެގެން ގުޅާފައިވާކަމަށް އައްޑޫ ސިޓީ ކައުންސިލުން ބުނެފިއެވެ.
ކައުންސިލުން ބުނީ ވިއްސާރާގައި އެންމެ ބޮޑަށް ގެއްލުން ލިބުނީ ފޭދޫއަށް ކަމަށެވެ. އެގޮތުން ފޭދޫގެ 544 ގެއަކުން ގުޅާފައިވާ ކަމަށެވެ. އަދި ހިތަދޫގެ 28 ގެއަކާއި މަރަދޫގެ 20 ގެއެއްގެ އިތުރުން މަރަދޫފޭދޫގެ 44 ގެއަކުން ކައުންސިލަށް ރިޕޯޓުކޮށްފައިވާ ކަމަށް އައްޑޫ ސިޓީ ކައުންސިލުން ވަނީ ބުނެފައެވެ.
ވިއްސާރާގައި އައްޑޫއަށް ލިބުނު ގެއްލުންތަކާ ގުޅޭގޮތުން ލޯކަލް ގަވަރމަންޓް އޮތޯރިޓީއާއި، އައްޑޫ ސިޓީ ކައުންސިލް އަދި ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީގެ ބޭފުޅުންނާއެކު ރައްޔިތުންގެ މަޖިލީހުގެ ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީގެ ބައްދަލުވުމެއް އިއްޔެ ރައްޔިތުންގެ މަޖިލީހުގައި ވަނީ ބާއްވާފައެވެ.
މި ބައްދަލުވުމުގައި ފޭދޫ ދާއިރާގެ ކައުންސިލަރު އަލީ ފަހުމީ ވަނީ ފޭދޫގެ ގެތަަކަށް ލިބުނު ގެއްލުން ތަކުގެ މައުލޫމާތު ހިއްސާކޮށްފައެވެ. ފަހުމީ ވިދާޅުވީ މިއީ ފަހުގެ ތާރީހެއްގައި ފޭދޫގައި އެންމެ ބޮޑަށް ފެން ބޮޑުވި ފަހަރު ކަމަށެވެ. އަދި ގެއްލުން ލިބުނު ގެތަކުގެ އަދަދުވެސް ގިނަ ކަމަށެވެ.
ވިއްސާރާގައި ގެއްލުންވި ގެތަކަށް އެހީތެރިވުމުގެ ގޮތުން އަލްމަރުހޫމު އަބްދުﷲ އަހުމަދު ފައުންޑޭޝަނުން އައްޑޫ ސިޓީ ކައުންސިލަށް 100،000 ރުފިޔާގެ ފައިސާގެ އެހީތެރިކަމެއް ވެދީފައިވާ އިރު ސަރުކާރުން ގެއްލުން ލިބުނު ގެތަކަށް ދޭނެ އެހީގެ އަދަދެއް އަދި ހާމަކޮށްފައިނުވެއެވެ.