ކޮވިޑް19 ގެ ހާލަތުން އަރައިގަނެ ނިއު ނޯމަލްގައި ރާއްޖޭގެ ބޯޑަރު ހުޅުވާލައި ސޭފް ޓޫރިޒަމް އަށް ރާއްޖެ ހުޅުވާލާއިރު އެކަމުގެ [ސޭފް ޓޫރިޒަމް]ގެ ލައިސަންސް ފީއެއްގެ ގޮތުގައި 50.000 ޑޮލަރުގެ ފީއެއް ނެގުމަށް ނިންމައިފިއެވެ.
މިގޮތަށް ހުށަހަޅާފައި ވަނީ ނިއު ނޯމަލްގައި ފަތުރުވެރިކަމުގެ ދާއިރާ ކުރިޔަށް ގެންދާނެ ގޮތާއި ގުޅޭ ގޮތުން ޓޫރިޒަމް މިނިސްޓްރީން އެކުލަވާލާފައިވާ "ސޭފް ޓޫރިޒަމް ޕްލޭން" ޑްރާފްޓު ރިޕޯޓުގައެވެ.
މި ރިޕޯޓުގައިވާ ގޮތުގައި ސޭފް ޓޫރިޒަމް އަށް 50،000 ޑޮލަރުގެ ލައިސަންސް ފީއެއް ދައްކަންޖެހެއެވެ. މި ރިޕޯޓުގައިވާ ގޮތުގައި ސޭފް ޓޫރިޒަމްގެ ކޮންމެ ރިސޯޓެއްގައި 10 ޕަސެންޓު އެނދު އައިސޮލޭޝަން އަށް ހާއްސަ ކުރަންޖެހެއެވެ. އަދި ކޮންމެ ރިސޯޓެއްގައި ރެޒިޑެންޓު ޑޮކްޓަރަކާއި ނަރުހެއް ހުންނަން ޖެހެއެވެ. އަދި އެކަށީގެންވާ ވަރަށް ޕީޕީއީ އަދި މުވައްޒަފުންވެސް ތިބެންވާނެ ކަމަށް އެ ޑްރާފްޓު ރިޕޯޓުގައިވެއެވެ.
އެ ރިޕޯޓުގައިވާ ގޮތުގައި ރިސޯޓުތަކުގެ ހުރިހާ މުވައްޒަފުން ޑިސްއިންފެކްޝަން ސޯޝަލް ޑިސްޓޭންސިން އަށް ތަމްރީން ކުރެވެން ޖެހެއެވެ. މީގެއިތުރުން މުވައްޒަފުންގެ ތެރެއިން 10 ޕަސެންޓު މުވައްޒަފުން ކަރަންޓީން ކުރެވޭ ވަރަށް ކަރަންޓީން ފެސިލިޓީތައް ހުންނަން ޖެހޭނީ ތައްޔާރު ކުރެވިފައެވެ.
ރާއްޖެ އަންނަ ފަތުރުވެރިޔާއާ އޭނާ ގެންނަ ލަގެޖާއި އޭނާ ދަތުރު ކުރުމަށް ގެންގުޅުނު ލިޔެކިޔުންތައް ޑިސްއިންފެކްޓު ކުރަންޖެހެއެވެ. އަދި ފަތުރުވެރިން ފުރަތަމަ އެއާޕޯޓަށް ވަންނަ ތަނުން އެމީހާގެ ހަށިގަނޑުގެ ޓެމްޕަރޭޗާ ޗެކުކޮށް ރަނގަޅަށް ބަލަންވާނެ ކަމަށްވެސް ބުނެފައިވެއެވެ. އަދި އަބަދުވެސް އެއް މީޓަރުގެ ދުރު މިނެއް ބަހައްޓަން ޖެހޭނެއެވެ.
އެއާޕޯޓުގައި މަސައްކަތް ކުރާ މުވައްޒަފުން މޫނު ނިވާކުރާ ޝީލްޑާއި އަންގި އަބަދުވެސް ޑިއުޓީގައި އުޅޭއިރު ލައްވައިގެން އުޅެންޖެހޭނެ ކަމަށް ރިޕޯޓުގައިވެއެވެ. އަދި ޑިއުޓީ ނިންމާލުމަށްފަހު މުވައްޒަފުން ޑިސްއިންފެކްޓު ކުރަންވާނެ ކަމަށްވެސް ބުނެފައިވެއެވެ.
މި ރިޕޯޓުގައި ނިއު ނޯމަލްގައި ރާއްޖެ އަންނަ ޖެޓުތަކުން 50،000 ޑޮލަރުގެ ޗާޖެއް ކުރާނެއެވެ. އަދި ޔޮޓާއި ސަފާރީތަކުން 10،000 ޑޮލަރުގެ ޗާޖެއް ކުރާނެއެވެ.