އައްޑޫ ސިޓީގައި 900 އަށް ވުރެ ގިނަ ފޭސް ޝީލްޑު އުފައްދައިފިއެވެ.
މި ފޭސް ޝީލްޑުތައް އުފައްދާފައިވަނީ އައްޑޫ ސިޓީގެ ކޯވިޑް-19 ޓާސްކު ފޯސްއާއި، ހޮސްޕިޓަލުގެ މުވައްޒަފުންގެ އިތުރުން ދަރުމަވެރިންގެ އެހީތެރިކަމާއެކުގައެވެ.
ޓާސްކު ފޯސް އިން ވާހަކަ ދެއްކެވި ބޭފުޅަކު ވިދާޅުވި ގޮތުގައި މި ފޭސް ޝީލްޑުތައް ހަދާފައިވަނީ އެއް ހަފްތާގެ ތެރޭގައެވެ. އަދި މިއީ ހޮސްޕިޓަލާއި އެނޫންވެސް ކޯވިޑް-19 އާއި ގުޅިގެން ޚިދުމަތް ދޭ ތަންތަނުގައި ބޭނުން ކުރެވޭނެ ޝީލްޑުތަކެކެވެ. މީގެ އިތުރުން އެފަރާތުން މަޢުލޫމާތު ދިން ގޮތުގައި މިވަގުތަށް ބޭނުން ވާ ވަރަށް މިހާރު ފޭސް ޝީލްޑު އެބަހުއްޓެވެ.
މި ފޭސް ޝީލްޑުތައް އައްޑޫގައި ހަދާފައިވާ އިރު، އައްޑޫގެ ހޮސްޕިޓަލާއި، ސިއްޙީ މަރުކަޒުތަކާއި، ސޯޝަލް ސަރވިސް ޑެސްކުތަކުގައި އެންމެ އެދެވޭނެ މިންވަރަށް ކޯވިޑް-19 އަށް ބޭނުންވާ ރައްކާތެރި ކަމުގެ ސާމާނު ނެތްކަން މީގެ ކުރިން ވަނީ ހާމަވެގެން ގޮސްފައެވެ. އަދި އައްޑޫގައި ކޭސް އެއް ފެނިގެން ދިޔަ ކަމުގެ ޚަބަރު ފެތުރުނު އިރު، އެ ބަލިމީހާއަށް ފަރުވާ ދިން ސިއްޙީ ޚިދުމަތްތެރިން ކޯވިޑް-19 އާއި ބެހޭ ގޮތުން ސަރުކާރުން ނެރެފައިވާ އެސްއޯޕީއާއި އެއްގޮތަށް ރައްކާތެރި ކަމުގެ ފިޔަވަޅުތައް އަޅާފައި ނުވާ ކަން ވެސް ހާމަވެގެން ދިޔައެވެ.
ބެލެވޭގޮތުގައި މި ފޭސް ޝީލްޑުތައް މިހާރު ބޭނުން ކުރެވޭ ހާލަތުގައި ހުރުމުން، އައްޑޫ އެކުއެޓޯރިއަލް ހޮސްޕިޓަލާއި، ކޯވިޑް-19 އާއި ގުޅުން ހުރި ޚިދުމަތްދޭ އިދާރާތަކުގެ މުވައްޒަފުން އެސްއޯޕީއާއި އެއްގޮތަށް މި ސާމާނު ބޭނުން ކުރަން ފަށާނެއެވެ.