މަސްތުވާތަކެތީގެ ބޮޑު މައްސަލައެއްގައި 11 މީހަކަށް ދައުވާ ކުރުމަށް ޕްރޮސެކިއުޓާ ޖެނެރަލްގެ އޮފީހުން ކްރިމިނަލް ކޯޓަށް ފޮނުވައިފިއެވެ.
ޕީޖީ އޮފީހުން ބުނީ ފުލުހުންގެ އިންޓަލިޖެންސްއާ ޑީއީޑީ އަދި މެރިން ޕޮލިސް ގުޅިގެން ހިންގާފައިވާ ބޮޑު އޮޕަރޭޝަންގައި މިދިޔަ މާޗު މަހުގެ 26ވަނަ ދުވަހު "އިރުއަލި" ކިޔާ މަސްދޯންޏަކުން އަތުލައިގެން މަސްތުވާތަކެތީގެ މައްސަލާގައި ކަމަށެވެ. އެ ފަހަރު ފުލުހުން ވަނީ 61 ކިލޯގެ މަސްތުވާތަކެތި އަތުލައިގެންފައެވެ. އަދި އެ މައްސަލަ އަކީ 11 މީހެއްގެ މައްޗަށް ތުހުމަތުވާ މައްސަލައެކެވެ.
އެ މައްސަލައިގައި ހައްޔަރު ކުރި 11 މީހުންގެ ތެރޭގައި ހިމެނެނީ، މަސް ދޯނިން ހައްޔަރު ކުރި ހަތް މީހަކާއި އެ މައްސަލައާއި ގުޅިގެން މާލެ އާއި ހުޅުމާލެއިން ހައްޔަރުކުރި ހަތަރު މީހެކެވެ.
ފުލުހުން ދާދިފަހަކުން ވަނީ ހަމަ އެ މައްސަލައާ ގުޅިގެން މާލެއާއި ހުޅުމާލޭގެ ގެއެއް ބަލާ ފާސްކޮށްފައެވެ. އަދި އެތަކެތީގެ ވިޔަފާރިކޮށް ހޯދާފައިވާ ގިނަ އަދަދެއްގެ ފައިސާ ފުލުހުން ވަނީ ހޯދާފައެވެ.
މިކަމާއި ގުޅިގެން [ދައުވާ ކުރަން ފޮނުވި މައްސަލައާ ގުޅިގެން] ޕީޖީ ޝަމީމް ވިދާޅުވީ ލޮކްޑައުންގެ މި ހާލަތުގައިވެސް 576 ސޮފްހާގެ ދައުވާ ޝީތެއް ތައްޔާރު ކުރުމަކީ ފަސޭހަ ކަމެއް ނޫން ކަމަށެވެ. ނަމަވެސް އެ މަސައްކަތް ކުރި އެ އޮފީހުގެ ވަކީލުންނަށް ޝުކުރާއި ސާބަސް ދަންނަވާ ކަމަށް ވިދާޅުވިއެވެ.