ރާއްޖޭގެ ޖަލުގައި ކޮވިޑް19 ނުފެނުނީ ކުރިން އެޅުނު ހަރުދަނަ ފިޔަވަޅުތަކުގެ ސަބަބުން ކަމަށް ކޮމިޝަނަރު އޮފް ޕްރިޒަންސް އަހުމަދު މުހައްމަދުފުޅު ވިދާޅުވެއްޖެއެވެ.
ފިތުރު އީދުގެ ތަހުނިޔާ ވިދާޅުވެ ފޮނުވި ވީޑިއޯ މެސެޖެއްގައި އަހުމަދު ވިދާޅުވީ ރާއްޖެއިން ކޮވިޑް19 ފެނުމާއި އެކު ޖަލުތަކުގައި އެ ވައިސް ފެތުރުނަ ނުދިއުމަށްޓަކައި ގިނަ ކަންކަން ރޭވިގެން ދިޔަ ކަމަށެވެ. އެގޮތުން ގައިދީންނާއި އޮފިސަރުންގެ ސަލާމަތާ ރައްކާތެރިކަމަށްޓަކައި ވަރަށް ކުރީކޮޅު ހަރުދަނާ ފިޔަވަޅުތަކެއް އެޅި ކަމަށްވެސް ވިދާޅުވިއެވެ.
މީގެއިތުރުން މާލެ ސަރަހައްދު ލޮކްޑައުން ކުރުމާއި އެކު ކަރެކްޝަންސްގެ ހިދުމަތްތައް އޮންލައިން ކޮށް ޖަލުތައް އެލާޓަށް ގެނެވުނު ކަމަށް އޭނާ ވިދާޅުވިއެވެ. އެކަންކަމުގެ ނަތީޖާއަކަށް ވެގެން ދިޔައީ އެއްވެސް ޖަލެއްގައި ކޮވިޑް19 ބަލީގެ އެއްވެސް އަލާމާތެއް ފެނިގެން ނުދިއުން ކަމަށް އަހުމަދު ވިދާޅުވިއެވެ.
ކަރެކްޝަންސް ބެލުގެ ދަށުގައި ހަތަރު ޖަލެއް ހިމެނޭއިރު އެ ހުރިހާ ޖަލުތަކުގައިވެސް ވައިރަސް ނެތްކަން ޔަގީން ކުރުމަށް ވަނީ ރެންޑޮމް ސާމްޕަލްތަކެއް ނަގާފައެވެ. ހުޅުމާލެ ޖަލު ފިޔަވާ އެހެން ހުރިހާ ޖަލެއްގެ ސާމްޕަލްތައް ލިބިފައިވާއިރު ލިބުނު ހުރިހާ ސާމްޕަލްއެއް ވަނީ ނެގެޓިވްވެފައެވެ.