ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ސަރުކާރުގައި ހިނގާދިޔަ ކޮރަޕްޝަނާއި ވައްކަމުގެ މައްސަލަތައް ކުރިޔަށް ގެންދަވާނެ ކަމުގެ ޔަގީންކަން ހޯމް މިނިސްޓަރު އިމްރާން އަބްދުﷲ ދެއްވައިފި ކަމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް މުހައްމަދު ނަޝީދު މިއަދު ކުރެއްވި ޓްވީޓެއްގައި ވިދާޅުވީ ފިތުރު އީދުގެ ތަހުނިޔާ ދަންނަވާލުމަށް އެމަނިކުފާނު މިނިސްޓަރު އިމްރާނަށް ގުޅުއްވި ކަމަށެވެ. އަދި މިދިޔަ ސަރުކާރުން ހިންގާފައިވާ ކޮޕަރްޝަނާއި ވައްކަމާއި މަރުތަކުގެ މައްސަލަތައް ކުރިޔަށް ގެންދިއުމަށް ކުރައްވަން ޖެހިވަޑައިގަންނަވާ ކަންކަން ކުރައްވާނެ ކަމުގެ ޔަގީންކަން މިނިސްޓަރު އިމްރާން ދެއްވާފައިވާ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު މިފަދައިން ވިދާޅުވެފައިވާއިރު ރާއްޖޭގައި މިހާތަނަށް ހިންގި އެންމެ ބޮޑު ހިޔާނާތްކަމަށްވާ އެމްއެމްޕީއާރުސީގެ ހިޔާނާތުގެ މައްސަލާގައި ކުރީގެ ރައީސް ޔާމީން އަބްދުލް ގައްޔޫމް އެކަނި ޖަލުގައި ބޭންދުމަކީ އިންސާފެއް ނޫން ކަމަށް އެމަނިކުފާނު ވަނީ މިފަހުން ވިދާޅުވެފައެވެ.
ނަޝީދުގެ އަމިއްލަ އަތްޕުޅުން ލިޔެ އެމްޑީޕީގެ އިސްފަރާތްތައް ހިމެނޭ ވަޓްސްއަޕް ގްރޫޕަކާއި ހިއްސާ ކުރެއްވި ލިޔުމެއްގައި ވިދާޅުވީ ރައީސް ޔާމީންގެ އަމަލުފުޅުތަކާއި އަދި ހިޔާލުފުޅުތަކަށް އެ މަނިކުފާނު ތާއީދު ނުކުރައްވާ ކަމަށާއި އެހެން ނަމަވެސް އެމްއެމްޕީއާރްސީގެ ހިޔާނާތުގެ މައްސަލާގައި "ހަމައެކަނި ރައީސް ޔާމީން ޖަލުގައި ބޭންދުމުގެ މާ ބޮޑު އިންސާފެއް އަޅުގަނޑަކަށް ނުވިސްނޭ" ކަމަށެވެ.
"އަޅުގަނޑުމެން ބުނީ ކުރީ ސަރުކާރުގެ ވައްކަމުގެ މައްސަލަތައް ބަލާނެކަމަށް، އެކަން ކުރުމުގައި އަޅުގަނޑުމެން ފަސް ޖެހެންވީ ސަބަބެއް ނެތް" ނަޝީދު ވިދާޅުވިއެވެ.
ނަޝީދު ވިދާޅުވީ ވެރިކަމަށް އައުމަށް ރައްޔިތުންނަށްވީ ވައުދު ފުއްދަން ޖެހޭ ކަމަށެވެ. އެގޮތުން މަރު ކޮމިޝަނުން ބަލަން ބުނި ކަންކަން ވެސް ބަލަން ޖެހޭ ކަމަށެވެ.
"މަރު ކޮމިޝަންގެ މައްސަލަތައްވެސް، ހަމަ މިފަދަ، ކުރާން ބުނި ކަންކަން އަޅުގަނޑުމެން ޖެހޭނީ ކުރަން" ނަޝީދުގެ މެސެޖުގައިވެއެވެ.
މިކަމާއި ގުޅިގެން [އެމްއެމްޕީއާރްސީ މައްސަލަ] ސޯޝަލް މީޑިއާގައި އެމްޑީޕީ މެންބަރުން އަންނަނީ ސަރުކާރަށް ފާޑު ކިޔަމުންނެވެ. އަދި ސަރުކާރުން ވެރިކަމަށް އައީ އެމްއެމްޕީއާރްސީ މައްސަލައާ ކުރީގެ ސަރުކާރުގެ ގޯސް ކަންކަން ބަލާނެ ކަމުގެ ޔަގީންކަން ރައްޔިތުންނަށް ދިނުމަށްފަހު ކަމަށާއި ނަމަވެސް އެކަން ކުރެވިފައި ނުވަނީ ކީއްވެގެންތޯ އެތައް ބަޔަކު އަންނަނީ ސުވާލު އުފައްދަމުންނެވެ.