ކޮވިޑް19 އާއި އެކުގައި ދިރިއުޅެން ދަސް ކުރަން ޖެހޭ ކަމަށާއި މިއަދު ރައްޔިތުން މަޖިލީހުގެ މެންބަރުން ވަނީ އެ ބައްޔާއި އެކުގައި އުޅެވޭނެ ކަމުގެ މިސާލު ދައްކުވައި ދެއްވާފައި ކަމަށް މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުން މަޖިލީހުގެ ޖަލްސާތައް މިދިޔަ މާޗު މަހުގެ 30ވަނަ ދުވަހު އޮންލައިންކޮށް ބާއްވަން ފެށިފަހުން މިއީ މަޖިލީހުގެ އިދާރާގައި ޖަލްސާ ބޭއްވި ފުރަތަމަ ފަހަރެވެ. މީގެކުރިންވެސް މަޖިލިސް އިދާރާގައި ޖަލްސާ ބޭއްވުމަށް މަސައްކަތް ކުރިއެވެ. ނަމަވެސް އޭގެ ދެތިން ދުވަސް ފަހުން މާލެއިން ކޮވިޑް19 ފެނުމުން ޖަލްސާތައް އަނެއްކާވެސް އޮންލައިންކޮށް ކުރިޔަށް ގެންދަން ނިންމިއެވެ.
ރައްޔިތުން މަޖިލީހުގެ އިދާރާގައި މިއަދު ޖަލްސާ ބާއްވާފައި ވަނީ ރައްކާތެރިކަމުގެ ފިޔަވަޅުތަކާއި އެކުގައެވެ. އެގޮތުން ހުރިހާ މެންބަރުންވެސް ތިއްބެވީ ދުރުދުރުގައެވެ. މެންބަރުން ތިއްބެވީ މާސްކުވެސް އަޅައިގެންނެވެ.
މިއަދުގެ މަޖިލިސް ޖަލްސާގައި މަޖިލިސް ރައީސް ވިދާޅުވީ މިފަދަ ހާލަތެއްގައި ވެސް މެންބަރުން ކުރައްވަނީ ބުރަ މަސައްކަތެއް ކަމަށެވެ. އަދި އެކަން ރާއްޖޭގެ ރައްޔިތުން ބަލައިގަންނަ ކަމަށް އޭނާ ވިދާޅުވިއެވެ.
"މި ރާއްޖެ އަލުން އަނބުރާ ހުޅުވިގެން މި ރޯގާއާ އެކު އުޅެން ޖެހޭނެ ކަން އެބަ އެނގޭ. ރައްޔިތުންނަށް އެ މިސާލު ދައްކަން މި މަޖިލީހުގެ މެންބަރުންނަށް ވުރެ ވަކި މުހިއްމު ބައެއް ނެތް،" ނަޝީދު ވިދާޅުވިއެވެ.
ނަޝީދު ވިދާޅުވީ މަޖިލީހުގެ ތަޅުމަށް މެންބަރުން އެއްވެގެން މަޖިލީހުގެ ޖަލްސާތައް ނުބޭއްވޭނަމަ ގާނޫނުތަކަށް ކޮންމެހެން ގެންނަން ޖެހޭ ބަދަލުތަކުގެ މަސައްކަތް ކުރުމަށް އެތައް ދަތިތަކާ ކުރިމަތިވެގެން ދާނެ ކަމަށެވެ.