މިހާރު މަގާމުގައި ތިބި ކައުންސިލަރުންގެ މަގާމުތައް ދަންމާލުމުގެ ގޮތުން ގާނޫނުއަސާސީ އިސްލާހު ކުރުމަށް ވޯޓު ނުދެއްވާނެ ކަމަށް ރައްޔިތުން މަޖިލީހުގެ މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ ވިދާޅުވެއްޖެއެވެ.
ރައްޔިތުން މަޖިލީހުގެ މިއަދުގެ ޖަލްސާގައި ވާހަކަދައްކަވަމުން އިންތި ވަނީ ތަކުރާރުކޮށް މި ހާލަތުގައި ގާނޫނުއަސާސީ އިސްލާހު ނުކުރެވޭނެ ކަމަށެވެ. ދުނިޔޭގެ އެހެން ގައުމުތަކުގައި މިފަދަ ހާލަތެއްގައި ގާނޫނުއަސާސީ އިސްލާހު ނުކުރާނެ ކަމަށާއި އެކަން އެހެން ގައުމުތަކުން ކުރާ ކަމަށްވާ ނަމަ އެގޮތަށް ކުރެވިދާނެ ކަމަށް އޭނާ ވިދާޅުވިއެވެ.
ނަމަވެސް ދިވެހި ރައްޔިތުންގެ ދުސްތޫރަކީ ބޭނުންހާ އިރަކު ކުޅެލެވެން އޮތް އެއްޗެއް ނޫން ކަމަށް ވިދާޅުވެ އިންތި ވަނީ ގާނޫނުއަސާސީ އިސްލާހު ނުކުރެވޭނެ އެތައް ސަބަބުތައް ހާމަ ކުރައްވާފައެވެ.
"ޖެހިގެން ހުންނަ އެޕާޓުމަންޓުގައި އެއްބަނޑު އެއްބަފާ މީހުން ދިރިއުޅޭ ފްލޯތަކަށް އެކުގައި ރޯދަ ވީއްލާލުމަށް އިށީންނުމުގެ ފުރުސަތު ވެސް ނުލިބި. އެހާލަތުގައި މިތިބީ. މިއީ ހަމަ ގާނޫނުއަސާސީ އިސްލާހު ކުރެވޭނެ ވަގުތު. އަޅުގަނޑުމެންގެ މުސްކުޅި މައިންބަފައިން، ކޮންމެ މީހަކުވެސް ބޭނުންވާނެ އެމީހުން ގާތަށް ގޮސްލަން. އެއީ މާތްކަން އިތުރުވެގެންވާ ކަމެއް. މިހާލަތުގައި މައިންބަފައިން ގާތަށް ޒިޔާރަތް ނުކުރުން އެއީ މާތްކަން އިތުރުވެގެންވާ ކަމެއްގެ ގޮތުގައި މިހާރުގެ ހާލަތަށް ބަލާއިރުގައި އެކަން އޮތީ އެގޮތަށް، މިއީ ގާނޫނުއަސާސީ އިސްލާހު ކުރެވޭނެ ވަގުތެއްތޯ،" އިންތި ވިދާޅުވިއެވެ.
އެ މައްސަލައިގައި ތްރީލައިން ވިޕެއް ނެރުމަށް އެމްޑީޕީގެ ޕީޖީ ގްރޫޕްގައި ރޭ ނެގި ވޯޓްގައި ބައްދަލުވުމުގައި ބައިވެރިވި 54 މެމްބަރުންގެ ތެރެއިން 41 މެެމްބަރުން ވަނީ ސަރުކާރުން ގާނޫނު އަސާސީއަށް ހުށަހެޅި އިސްލާހު އެގޮތަށް ފާސްކުރަން ތްރީލައިން ވިޕެއް ނެރުމަށް ތާއީދު ކުރައްވައިފައެވެ.
އިންތި ވިދާޅުވީ ޕާޓީއިން ބުނި ނަމަވެސް އަމިއްލަޔަށް ގަބޫލުކުރެވިފައި އޮތް ގޮތަކާ ހިލާފަށް ވޯޓު ނުދޭނެ ކަމަށެވެ. އޭނާ ވިދާޅުވީ އޭނާ އަމަލުކުރާނީ އޭނާގެ ނަފްސަށް ގަބޫލުކުރެވިފައިވާ ގޮތަށް ކަމަށެވެ.