އަމާޒަކީ މިއަހަރުވެސް ރާއްޖެއަށް އެއް މިލިއަން ފަތުރުވެރިން ގެނައުން ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުވެއްޖެއެވެ.
ދައުލަތުގެ މީޑިއާ "ޕީއެސްއެމް ނިއުސް" އަށް ދެއްވި އިންޓަވިއުއެއްގައި ވާހަކަދައްކަވަމުން މިނިސްޓަރު އަލީ ވަހީދު ވިދާޅުވީ ރާއްޖޭގެ ފަތުރުވެރިކަން ކޮޅަށް ޖެހުމަށް ކަމާ ގުޅުންހުރި ހުރިހާ ފަރާތްތަކެއް ގުޅިގެން މަސައްކަތް ކުރަމުން އަންނަ ކަމަށެވެ. މިއަހަރު ރާއްޖެއަށް އެއްވެސް ފަތުރުވެރިއަކު ނާންނާނެ ކަމަށް ގަބޫލު ކުރެވުނު ކަމަށާއި އެހެންނަމަވެސް އުއްމީދު ކުރަނީވެސް އަދި މަސައްކަތް ކުރަނީވެސް ރާއްޖެއަށް އެއް މިލިއަން ފަތުރުވެރިން ރާއްޖެ ގެނައުމަށް ކަމަށް މިނިސްޓަރު އަލީ ވަހީދު ވިދާޅުވިއެވެ.
"އަޅުގަނޑުމެން މަސައްކަތް އިރާދަކުރެއްވިއްޔާ ކުރާނީ މިއަހަރު ނިމޭއިރު 1 މިލިއަން މާރކް އަޅުގަނޑުމެންނަށް ރީޗްކުރެވޭތޯ. ފަތުރުވެރިކަން ފަށައިގަނެގެން ވަރުގަދަ މަސައްކަތެއް ކުރެވިއްޖިއްޔާ ނުވެދާނެ ކަމެއްނޫން އެއީ." އަލީ ވަހީދު ވިދާޅުވިއެވެ.
ޓޫރިޒަމް މިނިސްޓަރު އަލީ ވަހީދު މިފަދައިން ވިދާޅުވިއިރު "ސޭފް ޓޫރިޒަމް ގައިޑްލައިން"އެއް ޓޫރިޒަމް މިނިސްޓްރީން ވަނީ އެކުލަވާލައިފައެވެ. ޓޫރިޒަމް މިނިސްޓްރީން ބުނީ ސޭފް ޓޫރިޒަމް ގައިޑްލައިންގެ ފައިނަލް ޑްރާފްޓެއް އަންނަ ޖޫން 1 ވަނަ ދުވަހުގެ ކުރިން އާއްމު ކުރާނެ ކަމަށެވެ.
ޓޫރިޒަމް މިނިސްޓްރީން މިހާރު އެކުލަވާލާފައިވާ ޑްރާފުޓުގައި ވަނީ ރާއްޖެއަށް އަންނަ ޕްރައިވެޓު ޖެޓުތަކުން ލޭންޑިން ފީގެ ގޮތުގައި 50،000 ޑޮލަރު އަދި ރާއްޖެ ވަންނަ ސުޕަ ޔޮޓްތަކުން 10،000 ޑޮލަރު ނެގުމަށެވެ. އަދި ސޭފް ޓޫރިޒަމް ރިސޯޓު ލައިސަންސްގެ ގޮތުގައި 50،000 ޑޮލަރު ދެއްކުމަށެވެ. މީގެ އިތުރުން ރާއްޖެ އަންނަ ފަތުރުވެރިން މަދުވެގެން 14 ދުވަހުގެ ޗުއްޓީ ބުކް ކުރުމަށާއި، ކޮންމެ ފަތުރުވެރިއަކު ކޮވިޑް-19 އަށް ޓެސްޓު ކުރުމަށް 100 ޑޮލަރު ނެގުމަށެވެ.