އިއްޔެ ޕޮޒިޓިވްވި މީހުންގެ ތެރޭގައި އެއް އަހަރުގެ ކުޑަކުއްޖެއް

އިއްޔެ ރާއްޖެއިން ކޮވިޑް19 އަށް ޕޮޒިޓިވްވި މީހުންގެ ތެރޭގައި އެއް އަހަރުގެ ކުޑަ ކުއްޖަކު ހިމެނިއްޖެއެވެ.

އިއްޔެ ރާއްޖެއިން ވަނީ 101 މީހަކު ކޮވިޑް19 އަށް ޕޮޒިޓިވްވެފައެވެ. ޕޮޒިޓިވްވި މީހުންގެ ތެރޭގައި ހިމެނެނީ ބަންގްލަދޭޝް އަށް ނިސްބަތްވާ 72 މީހުން އަދި އިންޑިޔާއަށް ނިސްބަތްވާ 21 މީހުންގެ އިތުރުން 8 ދިވެހިންނެވެ.

ޕޮޒިޓިވްވި ދިވެހިންގެ ތެރޭގައި އެއް އަހަރުގެ ކުޑަ ކުއްޖަކު ހިމެނެއެވެ. އަދި 12 އަހަރުގެ އަންހެން ކުއްޖަކާއި 66 އަހަރުގެ އަންހެނަކުވެސް ހިމެނެއެވެ. މީގެކުރިން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފައިވަނީ ރާއްޖެ އިން ވަނީ އުމުރުން 10 އަހަރުން ދަށުގެ 51 ކުއްޖަކު ހިމެނޭ ކަމަށެވެ. އޭގެ ތެރޭގައި ހިމެނެނީ 29 ފިރިހެން ކުދިންނާއި 23 އަންހެން ކުދިންނެވެ.

ރާއްޖެއިން މި ބައްޔަށް ޕޮޒިޓިވްވި މީހުންގެ ޖުމްލަ އަދަދު މިހާރު ވަނީ 1773 އަށް އަރާފައެވެ. މި ބައްޔަށް ޕޮޒިޓިވްވި މީހުންގެ ތެރެއިން 453 މީހުން ރަނގަޅުވެފައިވާއިރު ފަސް މީހަކު ވަނީ މަރުވެފައެވެ. އަދި 12 މީހަކަށް އަންނަނީ ހޮސްޕިޓަލުގައި ފަރުވާ ދެމުންނެވެ.

ގިނަ އަދަދެއްގެ ބަޔަކު މި ބައްޔަށް ރެއިން ފެށިގެން މިއަދު އިރުއޮއްސި 6 ޖެހުމާ ހަމައަށް ޕޮޒިޓިވް ވެފައިވާއިރު، ޓެސްޓު ކުރުމުގެ ކަންކަން މިހާރު އަންނަނީ ތިން ތަނެއްގައި ކުރަމުންނެވެ. އެއީ އައިޖީއެމްއެޗާއި، ފުލުހުންގެ ލެބްގެ އިތުރުން އޭޑީކޭ ހޮސްޕިޓަލުގައެވެ.

ވޭތުވެދިޔަ 24 ގަޑިއިރުގެ ތެރޭގައި 476 ސާމްޕަލް ނަގާފައިވާއިރު، 502 ސާމްޕަލެއްގެ ނަތީޖާ އަދި ލިބިފައެއް ނުވެއެވެ.