އިންތިގާލީ ކައުންސިލްގެ ގިނަ ބާރުތަކެއް ނެގުމަށް ރައްޔިތުންގެ މަޖިލީހުން ފާސްކޮށްފިއެވެ.
މާދަމާ އަކީ މިހާރު ތިބި ކައުންސިލަރުން މަގާމުގައި ތިއްބަވާނެ އެންމެ ފަހު ދުވަހެވެ. އޭގެ ކުރިން ގާނޫނުއަސާސީ އިސްލާހުކޮށް އެ ކައުންސިލަރުންނަށް މަގާމުގައި ދެމި ތިބެވޭނެ ގޮތް މަޖިލީހުން ވަނީ ހަދައި ދީފައެވެ. އެއީ އަންނަ ކައުންސިލެއް އިންތިހާބު ކުރަންދެން މަގާމުގައި ދެމިތިބުމެވެ.
ސަރުކާރު ހިންގާ މައިޕާޓީގެ މެންބަރު ހެންވޭރު ހުޅަނގު ދާއިރާގެ މެންބަރު ހަސަން ލަތީފު އަމިއްލަފުޅަށް ހުށަހެޅުއްވި "އިދާރީ ދާއިރާތައް ލާމަރުކަޒީ އުސޫލުން ހިންގުން ކަށަވަރު ކުރުމުގެ ހާއްސަ ބިލު 2020" މަޖިލީހުން ރޭ ވަނީ 73 މެންބަރުންގެ ވޯޓުން ފާސްކުރައްވާފައެވެ.
މި ބިލުގައި މިހާރު ތިބި ކައުންސިލަރުންނަށް ނުވަތަ ކައުންސިލްތަކަށް ލިބިދީފައިވާ ގިނަ ބާރުތަކެއް ނެގުމަށް ވަނީ ނިންމާފައެވެ. އެގޮތުން އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން ލިބިދީފައިވާ ބާރުތަކުގެ ތެރެއިން ގިނަ ބާރުތަކެއް ނެގުމަށް ވަނީ ނިންމާފައެވެ. އޭގެތެރޭގައި ހަމަސް ދުވަހަށް ވުރެ ދިގު މުއްދަތަކަށް ކުއްޔަށް ދިނުމާއި، އެހެން ފަރާތަކަށް އަގެއް ނުލިބޭގޮތަށް ދިނުމާއި ނުވަތަ ހަވާލު ކުރުން ފަދަ ކަންކަން ހިމެނެއެވެ.
މިބިލު ރައީސުލްޖުމްހޫރިއްޔާ ތަސްދީގު ކުރައްވާ ހިސާބުން ފެށިގެން ލޯކަލް ގަވަރުމަންޓު އޮތޯރިޓީ (އެލްޖީއޭ)ގެ ބޯޑު އުވިގެން ދާނެ ކަމަށް ބުނެފައިވާއިރު އަލުން ބޯޑަށް ހަތް މެންބަރަކު އައްޔަން ކުރުމުގެ ބާރުވެސް ރައީސުލްޖުމްހޫރިއްޔާ އަށް ދެއްވާފައިވެއެވެ.
ދައުރު ދިގު ކުރަން ގާނޫނު އަސާސީއަށް އިސްލާހު ގެނައުމާ މެދު އެމްޑީޕީގެ މެންބަރުންގެ މެދުގައި ހިޔާލު ތަފާތުވުން ބޮޑުވެފައިވަނިކޮށް ސަންސެޓް ގާނޫނަކުން އެ ކަން ކުރެވޭނެ ކަމަށް ވިދާޅުވެ ހަސަން ލަތީފު ވެސް ބިލެއް ހުށަހެޅުއްވީއެވެ.
ނަމަވެސް ކައުންސިލަރުންގެ ދައުރު ދެންމޭނީ ގާނޫނު އަސާސީ އިސްލާހު ކޮށްގެން ކަމަށް ބަންޑާރަ ނައިބު އިބްރާހިމް ރިފްއަތާއި މަޖިލީހުގެ ކައުންސިލަ ޖެނެރަލް ފާތިމަތު ފިލްޒާ އާއިި ސުޕްރީމް ކޯޓުން ލަފާ ދެއްވިއެވެ.