މިއަދު ސަރުކާރު ހިންގުމުގެ މައިޕާޓީގެ ގޮތުގައި އޮތް އެމްޑީޕީ އަކީ އަބަދުވެސް ތަޅާފޮޅުން އިސްކުރި ބައެއް ކަމަށާއި ރައްޔިތުން އަބަދަކު އެ މަންޒަރު ބަލަން ނުތިބޭނެ ކަމަށް ކުރީގެ ނާއިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ރައްޔިތުންގެ މަޖިލީހުގެ ރޭގެ ޖަލްސާގައި ނައިފަރު ދާއިރާގެ މެމްބަރު އަހުމަދު ޝިޔާމަށް އަނިޔާކުރި މައްސަލައާ ގުޅިގެން ކަންބޮޑުވުންފާޅު ކުރައްވާ ޖަމީލް ކުރެއްވި ޓްވީޓެއްގައި މިއަދު ވިދާޅުވީ ރޭ ފެނިގެން ދިޔައީ ރިޔާސަތުގެ ފެންވަރު ކަމަށެވެ. ނައިފަރު ދާއިރާގެ މެންބަރު އަހްމަދު ޝިޔާމަށް އެމްޑީޕީ މެންބަރުން ހަމަލާ ދިނުމަކީ ދަށު ދަރަޖައިގެ ފިނޑި އަމަލެއް ކަމަށްވެސް ޖަމީލް ވިދާޅުވިއެވެ.
"މިއީ އަބަދުވެސް ތަޅާފޮޅުން އިސްކުރި ބައެއް [އެމްޑީޕީ]. އަނިޔާވެރިކަން ބަލަން ރައްޔިތުން ނުތިބޭނެ ކަން ދުނިޔެއިން ފެންނަ މަންޒަރުތަކުން ދަސްކުރަންޖެހޭ،" ޖަމީލް ވިދާޅުވިއެވެ.
Majleehun rey fenigen dhiyaee riyaasathuge fenvaru. MP @Shiyamaldives ah MDP membarun hamalaa dhinumakee dhashu dharajaige, findi amaleh. Miee abadhuves thalhaafolhun iskuri baeh. Aniyaaverikan balan rayyithun madun nuthibeynekan, dhuniyein fenna manzaruthakun dhaskuran jehey. pic.twitter.com/YMLw1dIXGF
— Mohamed Jameel Ahmed (@MJameelAhmed) June 2, 2020
ރޭ ދަންވަރު 1:30 ގައި ބޭއްވި ޖަލްސާ ފެއްޓުމާއެކު އަޑުގަދަ ކުރައްވަން ފެއްޓެވުމުން މަޖިލީހުގެ ރައީސް ވަނީ ޕީޕީއެމްގެ ނައިބު ރައީސްކަން ވެސް ކުރައްވަމުން ގެންދަވާ ޝިޔާމްގެ ނަން އިއްވައި ތަޅުމުން ނިކުންނަން އަންގަވާފައެވެ. ނަމަވެސް އެކަމަށް ޝިޔާމް ދެކޮޅު ހެދުމުން ސަރުކާރަށް ތާއީދުކުރާ މެމްބަރުންނާއި އޭނާ އާއި ދެމެދު ކޮންމެވެސް ވަރެއްގެ ކުރިމަތިލުންތަކެއް ވަނީ ހިނގާފައެވެ.
އެކަމާ ގުޅިގެން އިދިކޮޅުން ނެރުނު ބަޔާނެއްގައި ބުނީ މަޖިލީހުގެ ރައީސްގެ އެންގެވުމަށް އެމްޑީޕީ މެމްބަރުންނާއި ސަރޖަންޓް އޮފް އާމްސް ގުޅިގެން ޝިޔާމްގެ ހަށިކޮޅަށް އަތްލާ ވަރަށް ބޮޑަށް އަނިޔާކޮށްފައިވާ ކަމަށާއި އެކަން ހަރުކަށި އިބަރާތުން ކުށްވެރިކުރާ ކަމަށެވެ. އަދި މި މައްސަލަ ބަލައި ފިޔަވަޅު އަޅަން ފުލުހުންނަށް ވެސް އިދިކޮޅުން ވަނީ ގޮވާލާފައެވެ.