ރައްޔިތުން މަޖިލީހުގެ މިހާރުގެ ރައީސް، އަދި ކުރީގެ ރައީސް މުހައްމަދު ނަޝީދުގެ ވެރިކަމުގައި ކްރިމިނަލް ކޯޓުގެ ކުރީގެ އިސް ގާޒީ އަބްދުﷲ މުހައްމަދު (އަބްދުﷲ ގާޒީ) ހައްޔަރު ކުރުމާއި ގުޅިގެން ރައީސް ނަޝީދުގެ މައްޗަށް ޓެރަރިޒަމްގެ ދައުވާ އުފުލީ އެއްވެސް މީހެއްގެ ނުފޫޒެއް އޮވެގެން ނޫން ކަމަށް އޭރުގެ ޕްރޮސިކިއުޓަރު ޖެނެރަލްގެ މަގާމުގައި ހުންނެވި މުހުތާޒު މުހުސިން ވިދާޅުވެއްޖެއެވެ.
ރާއްޖެޓީވީގެ ޕްރޮގްރާމެއްގައި ވާހަކަދައްކަވަމުން މުހުތާޒު ވިދާޅުވީ ރައީސް ނަޝީދުގެ މައްޗަށް ޓެރަރިޒަމްގެ ދައުވާ އުފުލުމަށް ސިޔާސީ އެއްވެސް ބޭފުޅެއްގެ ފަރާތުންވެސް އަދި އޭރު ވެރިކަމުގައި ހުންނެވި ރައީސް އަބްދުﷲ ޔާމީންގެ ފަރާތްޕުޅުން ވެސް އެއްވެސް ނުފޫޒެއް ފޯރުވާފައި ނުވާ ކަމަށެވެ. އޭނާ ވިދާޅުވީ އެކަން ކުރީ ޕްރޮސިކިއުޓަރު ޖެނެރަލް އޮފީހުން މިނިވަންކަން މަތީގައި ކަމަށެވެ.
ކުރީގެ ރައީސް ޑރ. މުހައްމަދު ވަހީދުގެ ވެރިކަމުގައި ކުރިން ނަޝީދަށް އުފުލި ދައުވާ އަނބުރާ ގެނެސް އަލުން ދައުވާ ކުރުމަށް ނިންމާފައި ވަނީ ވެސް ހަތް ޕްރޮސިކިއުޓަރުންގެ މައްޗަށް އެކުލެވޭ ޓީމަކުން ކަމަށްވެސް މުހުތާޒު ވިދާޅުވިއެވެ. އަދި ދައުވާ ބަދަލުކުރުމަށް ނިންމި ނިންމުމަކީވެސް ޕީޖީ އޮފީހުގެ ނިންމުމެއް ކަމަށް މުހުތާޒު ވިދާޅުވިއެވެ.
ނަޝީދުގެ މައްޗަށް ކުރި އެ ދައުވާ ސާބިތުވެ ކްރިމިނަލް ކޯޓުން ވަނީ 13 އަހަރު ދުވަހުގެ ޖަލު ހުކުމެއްވެސް އިއްވާފައެވެ.