ގާނޫނު އަސާސީ އިސްލާހު ކުރުމަށް ރޭ ބޭއްވުނު ރައްޔިތުންގެ މަޖިލީހުގެ ޖަލްސާއަށް ވަޑައިގެންނެވި އެމްޑީޕީގެ ބައެއް މެމްބަރުން ތިބީ މަސްތުގެ ހާލަތުގައި، "ހަމައިން ނެއްޓިފައި" ކަމަށް ނޮޅިވަރަމް ދާއިރާގެ މެމްބަރު މުހައްމަދު ނަޝީދު(މޮސްޓާ) ތުހުމަތުކޮށްފިއެވެ.
ރޭ ދަންވަރު 1:30 ގައި ބޭއްވި ޖަލްސާ ވަރަށް ބޮޑަށް ހޫނުވެ، އެމްޑީޕީ މެމްބަރުންނާ ޕީޕީއެމްގެ ޕީޖީ ޝިޔާމާ ދެމެދު ވަނީ ކުރިމަތިލުންތަކެއް ވެސް ހިނގައި، ޝިޔާމަށް އަނިޔާވެސް ވެފައެވެ.
ޖަލްސާ ފެށުމާއެކު ޝިޔާމް ވަނީ އަޑުގަދަ ކުރައްވައި ގާނޫނު އަސާސީ އިސްލާހު ކުރުމާ ދެކޮޅަށް ވާހަކަ ދައްކާފައެވެ. ޝިޔާމްގެ އަމަލުތައް ހުރީ މަޖިލިސް ހުއްޓުވުމަށް ކަމަށް ބަލައި، ރިޔާސަތުން ވަނީ އޭނާގެ ނަން އިއްވައި ތަޅުމުން ބޭރުވާން އަންގަވާފައެވެ.
ނަމަވެސް މަޖިލިސް ތަޅުމުން ނިކުތުމަށް ދެކޮޅު ހަދައި އަޑުގަދަކުރުން ކުރިއަށް ގެންދިއުމުން ޝިޔާމާއި، އެމްޑީޕީ މެމްބަރުންނާ ދެމެދު ވަނީ ކުރިމަތލުން ހިނގައި ތަޅާފޮޅައިގެންފައެވެ.
އެމްޑީޕީ މެމްބަރުންގެ އަމަލުތަކަށް ފާޑުކިޔައި މޮސްޓާ ކުރި ޓުވީޓެއްގައި ބުނެފައިވަނީ އެމްޑީޕީ މެމްބަރުން ތިބީ ބަނގުރާ ހިއްޕަވައިގެން ކަމަށް ތުހުމަތު ކުރެވޭ ކަމަށާއި އެ މައްސަލަ ފުލުހުން ބަލާ ދިނުމަށް ގޮވާލާ ކަމަށެވެ. މިޓުވީޓުގައި ސީޕީ ހަމީދު ވެސް އޭނާ ވަނީ ޓެގުކޮށްފައެވެ.
ރޭގެ ޖަލްސާގައި ޝިޔާމަށް އެމްޑީޕީ މެމްބަރުން ހަމަލާ ދިނީ ރައީސް ނަޝީދު އަންގަވައިގެން ކަމަށް އިދިކޮޅުން ތުހުމަތު ކުރެއެވެ. އަދި ރޭގައި ފެނިގެން ދިޔައީ ޚުދުމުހުތާރު ކަން ކަމަށް ބުނެ، ރައީސް ނަޝީދަށް އިދިކޮޅުން ވަނީ ވަރަށް ބޮޑަށް ފާޑުކިޔާފައެވެ.