އެމެރިކާގައި މިހާރު ކުރިއަށްދާ ސިލްސިލާ މުޒާހަރާތައް ހުއްޓުވުމަށް އިއުލާންކުރި ކާފިއުއަށް ބެލުމެއް ނެތި 8 ވަނަ ރޭ ވެސް މުޒާހަރާތައް ކުރިއަށް އެބަ ގެންދެއެވެ.
ޖޯޖް ފްލޮއިޑް، އުމުރުން 46 އަހަރުގެ ކަޅު ނަސްލުގެ މީހަކު ހައްޔަރުކުރުމުގައި ކަރަށް ފައިން އެރުމުގެ ސަބަބުން އޭނާ މަރުވުމުން، ނަސްލީ ތަފާތުކުރުންތައް ހުއްޓުވުމަށް ފެށި މުޒާހަރާތައް މިހާރު ވަނީ ކޮންޓްރޯލުން ނައްޓާފައެވެ.
މީހުން ގިނަވެ، ތަންތަން ލޫޓު ކުރުމާއި މާރާމާރީއާއި ހުޅުޖެހުން ވެސް އިތުރުވަމުން އަންނަ އިރު ފުލުހުން އަންނަނީ އިންތިހާއަށް ބާރުގެ ބޭނުންކޮށް މުޒާހަރާތައް ކޮންޓްރޯލް ކުރުމަށް މަސައްކަތް ކުރަމުންނެވެ. އެގޮތުން ކަރުނަ ގޭހާއި ރަބަރު ވަޒަނާއި، މުގުރު ބޭނުންކޮށް ބައިވެރިން ހައްޔަރުކުރަމުން ދިޔަ ނަމަވެސް، މީހުންގެ އަދަދު މަދެއް ނުވެއެވެ.
މުޒާހަރާތަކުގެ ތެރޭގައި، އޮމަހާގައި ބާއެއް ތެރޭ ކަޅު މީހެއްގެ ގަޔަށް ބަޑި ޖަހައި މަރާލި މައްސަލާގައި ދައުވާ ނުކުރަން ނިންމުމުން އިތުރު ފާޑުކިޔުންތަކާއި ނުރުހުން ވަނީ ޕްރޮސެކިއުޓަރުންނަށް އަމާޒުވެފައެވެ.
އޮމަހާ ޑިސްޓްރިކްޓް އެޓާނީ އޮފީހުން ބުނީ، ބާގެ ވެރިޔާ ބަޑި ޖެހީ އޭނާގެ އަމިއްލަ ސަލާމަތަށް ބަލާފައި ދިފާއު ވުމަށް ކަމަށެވެ. ނަމަވެސް މަރުވި ޒުވާނާގެ ވަކީލު ވަނީ، ވީޑިއޯ ފުޓޭޖުން ޒުވާނާ މަރާލީ އޭނާގެ ފަރާތުން އަނިޔާއެއް އަދި އިންޒާރެއް ވެސް ނުފެންނަނީސް ކަމަށެވެ.
މިމައްސަލަ ބަލައި، ބަޑި ޖެހި ބާގެ ވެރިޔާ އަށް ދައުވާ ކުރެވެން ޖެހޭނެ ކަމަށް ވަކީލު ބުނެފައިވެއެވެ.