ގުޅީފަޅު ހިއްކަމުގެ މަޝްރޫއުއާ ގުޅިގެން ވިލިމާލެ ފަރަށް ބޮޑެތި ގެއްލުންތަކެއް ވަމުން އަންނަ ކަމަށްބުނެ ދެކެވެމުން އަންނަ ވާހަކަތަކާއި ގުޅިގެން ޕްލޭނިން މިނިސްޓްރީން އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އިސްވެރިން މަޖލީހުގެ ކޮމެޓީއަށް ހާޒިރުންކުރަން ނިންމައިފިއެވެ.
ގުޅީފަޅު ހިއްކުމުގެ މަޝްރޫ އާއި ގުޅިގެން ވިލިމާލެ މޫދު ސަރަހައްދަށް ގެއްލުންވާ ކަމަށް ބުނެ މަދަނީ ޖަމިއްޔާތަކުން ކަންބޮޑުވުން ފާޅުކުރަމުން ދަނިކޮށް، ވިިލިމާލެ ސަރަހައްދުގައި މޫސުގެ ފެންގަނޑު ސާފު ކަމަށާއި އަދި ދިރުންތައް ދުޅަހެޔޮ ކަމަށް ކަމަށް އެންވަޔަރަމަންޓު ޕްރޮޓެކްޝަން އެޖެންސީ (އީޕީއޭ) އިން ވަނީ ބުނެފައެވެ.
ގުޅީފަޅުގެ ސަބަބުން ވިލިމާލެ މޫދު ސަރަހައްދަށް ގެއްލުން ވެފައިވޭތޯ ބަލަން އީޕީއޭއިން ތަހުލީލުތަކެއް ހަދާފައި ވާއިރު، އެ ތަހުލީލުތަކުން އެ ސަރަހައްދުގެ ފަރުތަކާއި މަސްތަކަށް ގެއްލުން ވެފައިވާކަން ފާހަގަ ނުކުރެވޭކަމަށް އީޕީއޭއިން ބުނެއެވެ.
އެހެންނަމަވެސް މިކަމުގައި ގިނަބައެއްގެ ކަންބޮޑުވުންތައް ހުރުމާއިއެކު އެ މައްސަލަ ބެލުމަށް މިހާރު ކޮމެޓީން ވަނީ ނިންމާފައެވެ. އެގޮތުން ގުޅިފަޅު ހިއްކުމަށް ކުރިއަށްގެންދާ މަޝްރޫޢުގެ ސަބަބުން ވިލިމާލެ ފަރަށް ގެއްލުންވާ މައްސަލަ ބެލުމަށް އެންވަޔަރަމެންޓް މިނިސްޓްރީއާއި ޕްލޭނިން މިނިސްޓްރީގެ އިތުރުން އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އިސްވެރިން އަންނަ ހޮނިހިރު ދުވަހު ކޮމެޓީއަށް ހާޒިރު ކުރުމަށް މިހާރު ވަނީ ނިންމާފައެވެ.
ގުޅީފަޅު ހިއްކުމުން ތިމާވެއްޓަށް ގެއްލުން ލިބޭ ކަމަށް ބުނެ މަދަނީ ޖަމިއްޔާތަކުން ދަނީ ކަންބޮޑުވުން ފާޅުކުރަމުންނެވެ. އެގޮތުން ގުޅީފަޅުގައި ވިޔަފާރި ބަނދަރެއް ތަރައްގީކުރުމުގެ ގޮތުން އެ ފަޅު ހިއްކުމުގެ މަސައްކަތް ކުރިއަށް ގެންދިއުމުގެ ސަބަބުން އެތަނުގެ ވަށައިގެންވާ ފަރުތަކަށް ބޮޑެތި ގެއްލުން ވަމުންދާކަމަށް ބުނެ ކުރީގެ ރައީސް އަދި މަޖިލީހުގެ ރައީސް މުހައްމަދު ނަޝީދުގެ މޯލްޑިވްސް ކޮރަލް އިންސްޓިޓިއުޓްއިން ރައްޔިތުންގެ މަޖިލީހާއި ކަމާއި ގުޅޭ އެހެނިހެން އިދާރާތަކަށް ވަނީ ގޮވާލާފައެވެ.