ޓްރާންސްޕޯޓް މިނިސްޓަރ "ގެއްލިއްޖެ" ކަމަށް ބުނެ އަމާޒުވާ ފާޑުކިޔުންތަކަށް މިނިސްޓަރ އާއިޝަތު ނަހުލާ ރައްދު ދެއްވައިފިއެވެ.
ރައްޔިތުންގެ މަޖިލީހުގެ ތަރައްގީއާއި ތަރިކައިގެ ކޮމިޓީއަށް ހާޒިރުކޮށް ސުވާލުކުރުމުން ނަހުލާ ވަނީ މަސައްކަތް ހުއްޓުމެއް ނެތް ކަމަށާއި މަސައްކަތް ކުރާ ކަން ނޭނގެނީ ފޮޓޯ ނުލާތީ ކަމަށް ވިދާޅުވެފައެވެ.
މިހާރު ދުނިޔެއަށް ކުރިމަތިވެފައިވާ ބޮޑު ބަލިމަޑުކަމުން ގައުމެއްގެ ގޮތުގައި އަރައިގަތުމަށް ރާއްޖެއާއި ދިވެހި ސަރުކާރުން ކުރާ މަސައްކަތުގައި ޓްރާންސްޕޯޓް މިނިސްޓްރީ ވެސް ހުއްޓުމެއް ނެތި އަދާ ކުރަން ޖެހޭ މަސައްކަތް ކުރަމުން އަންނަ ކަމަށް ނަހުލާ ވިދާޅުވެފައިވެއެވެ.
ޓްރާންސްޕޯޓާއި ސިވިލް އޭވިއޭޝަނަކީ އެކަމަނާގެ ޒިންމާއެއް ކަމަށާއި އެއްވެސް ކަމެއް ދޫދިނުމެއް ނެތި ބަލަމުން އަންނަ ކަމަށް ކޮމިޓީގައި ނަހުލާ ވިދާޅުވިއެވެ. "ގިނަ ރޭރޭ މަސައްކަތް ކުރެވިފައި ހުންނާނެ 3 ޖަހާއިރުވެސް، 4 ޖަހާ އިރުވެސް އަދި 5 ޖަހާ އިރުވެސް. އަނެއްކާ ހެނދުނު 07 އިން ތެދުވި ފަށަނީ މަސައްކަތް. ފްލައިޓް އައުމާއި ޖެއްސުން އެއީ ބަލަމުން އަންނަ ކަންތައްތައް،" މިނިސްޓަރ ވިދާޅުވިއެވެ.
ޓެކްސީ ޑްރައިވަރުންގެ ޝަކުވާތަކަށް ހައްލު ނުލިބޭ ކަމަށް ބުނުމުން މިނިސްޓަރު ވިދާޅުވީ، ދިމާވެފައިވަނީ ދަތި ދުވަސްތަކެއް ކަމަށާއި ކޮންމެ ފިޔަވަޅެއް ވެސް އަޅަން ޖެހެނީ ހުރިހާ ރައްޔިތުންގެ ސަލާމަތްކަން އިސްކުރުމަށް ފަހުގައި ކަމަށެވެ.