ކޮވިޑް19 ގެ ސަބަބުން މޮނީޓަރިންގެ ހާލަތު ނެތް ރަށްތަކުގައި ބޭންކް އޮފް މޯލްޑިވްސް (ބީއެމްއެލް)ގެ ހިދުމަތްތައް އަލުން ދޭން ފަށައިފިއެވެ.
ބީއެމްއެލްއިން ބުނީ މޮނީޓަރިން ހާލަތުގައި ނެތް ރަށްރަށުގެ ބީއެމްއެލްގެ ބްރާންޗްތަކުން ކޮންމެ ހަފްތާއެއްގެ ވެސް ހޯމަ، އަންގާރަ އަދި ބުރާސްފަތި ދުވަހު ޚިދުމަތް ފޯރުކޮށްދެމުން ގެންދާނެ ކަމަށެވެ. އަދި އެ ދުވަސްތަކުގައި ބީއެމްއެލްގެ ބްރާންޗުތައް ހުންނަ ރަށްރަށުން ލިބިގެން ދާނީ އޮންލައިންކޮން އަދި އޭޓީއެމްތަކުން ލިބިގެން ނުދާ ހިދުމަތްތައް ކަމަށްވެސް ބީއެމްއެލް އިން ބުނެއެވެ.
މާލެ ސަރަހައްދުން ކޮވިޑް19 ފެނުމާއި އެކު ބީއެމްއެލް އިން ވަނީ އެ ބޭންކުގެ ހިދުމަތްތަކަށް އެދޭ ފަރާތްތަކުންވެސް ވީހާވެސް ބޮޑަށް އޮންލައިންކޮށް ހިދުމަތް ހޯދުމަށް އިލްތިމާސްކޮށްފައެވެ. އެހެންނަމަވެސް ބޭންކުތައް ހުޅުވުމަށް އެމްއެމްއޭ އިން ހުއްދަ ދީފައިވާ ދުވަސްތަކުގައި ގިނަ އަދަދެއްގެ ބަޔަކު ވަނީ މީގެކުރިން ބޭންކަށް ގޮސް ހިދުމަތްތައް ހޯދާފައެވެ.
ސަރުކާރުން ލޮކްޑައުންއަށް ދީފައިވާ ލުޔާއެކު ބީއެމްއެލްގެ މާލޭ ބްރާންޗްތައް ހޯމަ، އަންގާރަ އަދި ބުދަ ދުވަހު ހުޅުވުމަށް ވަނީ ނިންމާފައެވެ.