ށ. ނަރުދޫ އަމާޒު ބޯޓުގެ ކެޕްޓަން ކޮވިޑް19 އަށް ޕޮޒިޓިވްވުމާއި ގުޅިގެން މެދުކަނޑާލާފައި އޮތް ބޯޓުގެ ދަތުރުތައް އަލުން ފަށައިފިއެވެ.
ނަރުދޫ ކައުންސިލް މެންބަރު މުހައްމަދު ނިޒާރު މީޑިއާތަކަށް ވިދާޅުވީ، ކަމާބެހޭ އިދާރާތަކުގެ އިރުޝާދު ހޯދުމަސްފަހު އެ ބޯޓުން މާލެދަތުރުތައް ފަށާފައިވަނީ އިއްޔެ ކަމަށެވެ.
އެންމެ ފުރަތަމަ ނަރުދޫ އިން ކޮވިޑް19 އަށް މީހަކު ޕޮޒިޓިވްވިކަން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިއުލާން ކުރީ މިދިޔަ އޭޕްރީލް މަހުގެ 25ވަނަ ދުވަހުއެވެ. އެމީހާއަކީ އަމާޒު ބޯޓުގެ ކެޕްޓަންއެވެ.
އަމާޒު ބޯޓުގެ ކެޕްޓަނުގެ އިތުރުން އެބޯޓުގެ ބައެއް ފަޅުވެރިންވެސް މި ބައްޔަށް ވަނީ ޕޮޒިޓިވްވެފައެވެ. އަދި ބޯޓުގެ ކެޕްޓަންގެ އާއިލާ މީހުންވެސް ވަނީ އެ ބައްޔަށް ޕޮޒިޓިވްވެފައެވެ. މި ކޭސްއާ ގުޅިގެން [އަމާޒު ބޯޓު ބޭސް] ނަރުދޫ އިން 11 މީހަކު ޖުމްލަ މި ބައްޔަށް ޕޮޒިޓިވްވިއެވެ.
އެކަމާ ގުޅިގެން ނަރުދޫ އާއި އިތުރު 13 ރަށެއް މޮނީޓަރިންގެ ހާލަތަށް ވަނީ ގެނެސްފައެވެ.