ރައްޔިތުންގެ މަންދޫބެއްގެ ހައިސިއްޔަތުން ގާނޫނުއަސާސީ ނަގަހައްޓާ ދެމެހެއްޓުމަށް ކުރަން ޖެހުނު ކޮންމެ މަސައްކަތެއް ސާބިތުކަމާއި އެކުގައި ކުރައްވާނެ ކަމަށް ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެވެ.
ގާނޫނުއަސާސީ އިސްލާހު ކުރުމުގެ ގޮތުން މި މަހުގެ ދެވަނަ ދުވަހު ބޭއްވި ރައްޔިތުން މަޖިލީހުގެ ޖަލްސާގައި ކަންކަން ހިނގާދިޔަ ގޮތާއި މިހާރުގެ ހާލަތު ބަޔާން ކޮށްދެއްވާ ޝިޔާމް ނެރުއްވި ބަޔާނެއްގައި ވިދާޅުވީ އެރޭގެ ޖަލްސާގައި މަޖިލީހުގެ ރިޔާސަތުން އޭނާގެ ނަން އިއްވީ ގަވާއިދާއި ހިލާފަށް ކަމަށެވެ.
ބަޔާނުގައި ޝިޔާމް ވިދާޅުވީ އޭނާ މަޖިލީހުގެ ތަޅުމުން ބޭރު ކުރުމަށް އެމްޑީޕީގެ ޕާލިމަންޓްރީ ގްރޫޕުގެ މެންބަރުންނަށް އެންގެވީ މަޖިލީހުގެ ރިޔާސަތުގައި ހުންނެވި މަޖިލީހުގެ ރައީސް، މުހައްމަދު ނަޝީދު ކަމަށެވެ. އަދި އެއީ ކަނޑައެޅިގެން މަޖިލީހުގެ ގަވާއިދާއި ހިލާފަށް މަޖިލީހުގެ ރައީސް އެންގެވި އެންގުވުމެއް ކަމަށް ޝިޔާމް ވިދާޅުވިއެވެ.
ޝިޔާމް ވިދާޅުވީ އޭނާ މަޖިލީހުގެ އިދާރާއިން ނެރުމަށް ކަމަށްބުނެ އެމްޑީޕީގެ މެންބަރުން އޭނާ އަށް އަނިޔާކުރި ކަމަށެވެ. އޭނާ މަޖިލީހުން ނެރުމަށް ކަމަށް ބުނެ އެމްޑީޕީގެ މެންބަރުން ހިންގި އަމަލަކީ ޖިނާއީ އަމަލެއް ކަމަށް ގަބޫލުކުރާ ކަމަށާއި އެހެންކަމުން އެ މައްސަލަ ތަހުގީގު ކޮށްދެއްވުމަށް އެދި ފުލުހުންނަށް ހުށަހަޅާފައިވާ ކަމަށްވެސް ޝިޔާމްގެ ބަޔާނުގައި ވިދާޅުވެފައިވެއެވެ. ޝިޔާމް ވިދާޅުވީ އުއްމީދު ކުރަނީ އެ މައްސަލަ އިންސާފުވެރިކަމާއި އެކުގައި ބަލާ ފިޔަވަޅު އެޅިގެން ދިއުން ކަމަށެވެ.
ލިބިގެން ދިޔަ އަނިޔާތަކަށް އިތުރު ފަރުވާ ހޯދުމުގެ ގޮތުން ރާއްޖެއިން ބޭރަށް ދާންޖެހިދާނެ ކަމުގެ އިޝާރާތެއް ޑޮކްޓަރުން ކުރައްވާފައިވާ ކަމަށްވެސް ޝިޔާމްގެ ބަޔާނުގައި ވިދާޅުވިއެވެ. އަދި އެކަމުގެ ތައްޔާރީތައް ވަމުން އަންނަ ކަމަށްވެސް ޝިޔާމް ވިދާޅުވިއެވެ. މީގެއިތުރުން ލިބިފައިވާ އަނިޔާތަކަށް ފަރުވާ ލިބި އިރާދަކުރެއްވިއްޔާ ކުރިޔަށްވުރެ ވަރުގަދަ ރޫހެއްގައި އެނބުރި އަންނާނެ ކަމަށް ޝިޔާމް ވިދާޅުވިއެވެ.