މާލެއާ ވިލިނގިއްޔާއި ދެމެދު ކުރާ ފެރީ ދަތުރުތައް އެމްޓީސީސީން އިތުރުކޮށްފިއެވެ.
އެމްޓީސީސީން ބުނީ އެގޮތަށް ނިންމީ މާލެ ސަރަހައްދަށް އިއުލާން ކޮށްފައިވާ ލޮކްޑައުން އަށް ލުއިތަކެއް ދިނުމަށް ނިންމާފައިވާތީ ހިދުމަތްތަކަށް ބުރޫ އެރުން ކުޑަ ކުރުމުގެ ގޮތުން ކަމަށެވެ. ލޮކްޑައުން އަށް ދިން ލުއިތަކާއި އެކު ވިލިގިނގިލީގައި ދިރިއުޅޭ ފަރާތްތައް މާލެ އަށް އައިސް ވިޔަފާރި ކުރުމުގެ ފުރުސަތު ވެސް ވަނީ ހުޅުވާލައިފައެވެ.
ކޮވިޑް19 އިން ރައްކާތެރިވުމުގެ ގޮތުން މާލެ ސަރަހައްދުގައި އިއުލާން ކުރި ކާފިއުގެ ވަގުތުތަކުގައިވެސް އެމްޓީސީސީން ވަނީ ފެރީތަކުގެ ވަގުތަށް ބައެއް ބަދަލުތައް ގެނެސްފައެވެ. އޭރު އެންމެ ބޮޑު ބަދަލެއް ގެނެސްފައިވަނީ ކާފިއު ހިންގާ ވަގުތު ގެ ކުރިން ބާއްވާ އެންމެ ފަހު ފެރީގެ ވަގުތަށެވެ.
ފެރީ ދަތުރުތަކަށް ގެނައި ބަދަލުތަކުގެ ދަށުން މިހާރު ކޮޅަކަށް 20 ދަތުރު ކުރަމުންދާނެއެވެ. މިވަރަށް ދަތުރުތައް ކުރުމަށް ނިންމާފައިވަނީ ނޭޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ)ގެ ލަފާގެވެސް މަތިންނެވެ.
އެމްޓީސީސީން އަންނަނީ މާލެ ސަރަހައްދުގެ އިތުރުން ރާއްޖޭގެ އެކި ސަރަހައްދުތަކުގައި ފެރީގެ ހިދުމަތް ފޯރުކޮށްދެމުންނެވެ.