ފ. ދަރަނބޫދޫ ބަނދަރު ބޮޑު ކުރުމުގެ އަމަލީ މަސައްކަތް އެމްޓީސީސީން ފަށައިފިއެވެ.
ދައުލަތުގެ ބަޖެޓުން 38.2 މިލިއަން ރުފިޔާ ހަރަދުކޮށްގެން ހަދާ މި ބަނދަރު ހެދުމުގެ މަސައްކަތް އެމްޓީސީސީއާ ހަވާލުކޮށްފައި ވަނީ މިދިޔަ އަހަރުގެ ޑިސެމްބަރު މަހުގެ ތެރޭގައެވެ. މަސައްކަތަށް ބޭނުންވާ ސާމާނު ދަރަނބޫދޫ އަށް އެމްޓީސީސީން ގެންގޮސްފައި ވަނީ މިދިޔަ މަހުގެ 27ވަނަ ދުވަހުއެވެ.
މި މަޝްރޫއުގެ ދަށުން ބޮޑު ހިލަ ބޭނުންކޮށްގެން 410 މީޓަރު ބޭރު ތޮށި ހެދުމާއި 196 މީޓަރުގެ އެއްގަމު ތޮށި ހެދުމަށް ވަނީ ހަމަޖެހިފައެވެ. އަދި 10 މޫރިން ބުލޮކްލުމާއި، 10 ބަނދަރު ބައްތި ހަރުކުރުމާއި، ދެ ނެރު ބައްތި ހަރުކުރުމަށް ވެސް ވަނީ ހަމަޖެހިފައެވެ.
މި މަސައްކަތް 397 ދުވަހުގެ ތެރޭގައި ނިންމަން ޖެހޭނެއެވެ. މި ބަނދަރު ބޮޑު ކުރުމުން ބޮޑެތި އުޅަނދު ފަހަރުތަކަށް ދަރަނބޫދޫ އަށް ވަދެ ނިކުތުމުގައި އިތުރު ފަސޭހަތަކެއް ލިބިގެން ދާނެއެވެ.