ކޮވިޑް19 އާއި ގުޅިގެން ސަރުކާރުން ހިންގުމަށް ރާވާފައިވާ މަސައްކަތްތަކާއި އަދި އެ ބައްޔާއި ދެކޮޅަށް ސަރުކާރުން އަޅާފައިވާ ފިޔަވަޅުތަކާއި ގުޅިގެން ރައްޔިތުންގެ މަޖިލީހުން ދިރާސާކުރި މައްސަލާގައި މެންބަރުންނަށް ފެނިވަޑައިގެންނެވި ލަފާތައް ރައީސް އިބްރާހީމް މުހައްމަދު ސޯލިހަށް އެރުވުމަށް ނިންމައިފިއެވެ.
ރައްޔިތުންގެ މަޖިލީހަށް އެ މައްސަލަ ހުށަހެޅުއްވީ މަޖިލީހުގެ މެޖޯރިޓީ ލީޑަރު އަދި މެދުހެންވޭރު ދާއިރާގެ މެންބަރު އަލީ އާޒިމްއެވެ. އޭނާ ހުށަހެޅުއްވީ ސަރުކާރުން ރާވާފައިވާ މަސައްކަތްތަކާއި ގުޅިގެން މަޖިލީހަށް ފެންނަ ގޮތެއް ހޯދުމަށެވެ. އަދި އެކަމާއި ގުޅިގެން މަޖިލީހުގެ މެންބަރުން މިދިޔަ ރޯދަ މަސް ތެރޭގައި ވަނީ ބުރަ މަސައްކަތްތަކެއްކޮށް ގިނަ ބައްދަލުވުންތަކެއް ބާއްވާ މައްސަލަ ދިރާސާ ކޮށްފައެވެ.
ކަމާގުޅުންހުރި އިދާރާތަކުގެ ވެރިން ހާޒިރުކޮށްގެން މަޖިލީހުން ވަނީ ކޮވިޑް19 އާއި ގުޅިގެން އެ އިދާރާތަކުން އަޅާފައިވާ ފިޔަވަޅުތަކާއި އަދި ކުރިޔަށް އޮތްތަނުގައި މަސައްކަތްތައް ރާވާފައިވާ ގޮތްތަކާއި ގުޅޭ މައުލޫމާތު ކޮމެޓީތަކުން އެއްކޮށް 400 ސޮފްހާގެ ރިޕޯޓެއް ވަނީ އެކުލަވާލައިފައެވެ.
މިއަދުގެ ޖަލްސާ ފައްޓަވަވަމުން މަޖިލީހުގެ ރައީސް، ރައީސް މުހައްމަދު ނަޝީދު ވަނީ މިއަދު އެ ރިޕޯޓު ނުވަތަ ލަފާ އެމަނިކުފާނު ރައީސް ސޯލިހަށް އަރުއްވާނެ ކަމަށް ވިދާޅުވެފައެވެ.