ޗައިނާއާ ރާއްޖެއާ ދެމެދު ސޮއިކޮށްފައިވާ ފްރީ ޓްރޭޑު އެގްރީމަންޓު ނުވަތަ މިނިވަން ވިޔަފާރީގެ އެއްބަސްވުމާއި ގުޅިގެން ރައްޔިތުންގެ މަޖިލީހުން ގޮތެއް ނިންމަންޖެހޭ ކަމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުން މަޖިލީހުގެ މިއަދުގެ ޖަލްސާގައި ވާހަކަދައްކަވަމުން ރައީސް ނަޝީދު ވިދާޅުވީ މިނިވަން ވިޔަފާރީގެ އެއްބަސްވުމުގެ ދަށުން އެއްވެސް މަސައްކަތެއް މިހާތަނަށް ކުރެވިފައި ނުވާ ކަމަށެވެ. އެހެންކަމުން އެ އެއްބަސްވުން ދެމިއޮތް ކަމަކަށް ނުބެލެވޭނެ ކަމަށްވެސް ނަޝީދު ވިދާޅުވިއެވެ. އެހެންނަމަވެސް އެކަމާއި ގުޅިގެން ކޮންމެވެސް ދުވަހަކުން މަޖިލީހުން ގޮތެއްވެސް ނިންމަން ޖެހޭނެ ކަމަށް ރައީސް ނަޝީދު ވިދާޅުވިއެވެ.
ނަޝީދު މިފަދައިން ވިދާޅުވެފައިވާއިރު އިންޑިއާގެ މީޑިއާއަކަށް ނަޝީދު ދެއްވި އިންޓަވިއުއެއްގައި މީގެކުރިން ވިދާޅުވީ އެ އެއްބަސްވުން ވަނީ މަރުވެފައި ކަމަށާއި ކުރިއަށް ނުދާ ކަމަށެވެ. އަދި އެއްބަސްވުން ތަންފީޒު ކުރުމަށް މަޖިލީހަށް ރުހުން ދޭންޖެހޭ ކަމަށާއި އެކަމަކު މިހާރު މަޖިލީހުގެ މެމްބަރުން އެކަމަށް ޝައުގުވެރިކަން ހުންނާނެހެން ހީފުޅުނުވާ ކަމަށް އެމަނިކުފާނު ވިދާޅުވިއެވެ.
ދިވެހި ސަރުކާރުން ޗައިނާއާ އެކު ފްރީ ޓްރޭޑް އެގްރީމެންޓުގައި ސޮއިކޮށްފައި ވަނީ ޑިސެމްބަރު 18، 2014 ގައެވެ. އަދި އެ އެއްބަސްވުމުން ކުރިއަށް ގެންދަން މަޖިލީހުން ފާސްކޮށްފައި ވަނީ ނޮވެމްބަރު 29، 2017 ގައެވެ.