ބްރޮޑްކާސްޓިން ކޮމިޝަން، (ބްރޮޑްކޮމް)ގެ ހުސްވެފައިވާ މެމްބަރު ކަމުގެ މަގާމަށް ވީޓީވީގެ ސީނިއާ އެޑިޓަރުގެ މަގާމުގައި ހުރި އާމިނަތު އަމީނާ (އަނާ) އައްޔަން ކުރުމަށް ރައްޔިތުންގެ މަޖިލީހުން ފާސްކޮށްފިއެވެ.
މި މަގާމަށް އަނާ އައްޔަން ކުރުމަށް ފާސްކުރީ 62 މެންބަރުންގެ ވޯޓުންނެވެ. މިނިވަން މުއައްސަސާތަކުގެ ކޮމެޓީން މަޖިލީހުގެ ތަޅުމަށް ނަންތައް ފޮނުވިއިރު ދެ ނަމަކަށް އިސްކަން ދީފައިވެއެވެ. އެއީ އަނާގެ އިތުރުން ރާއްޖެޓީވީގެ ނޫސްވެރިޔާ މުހައްމަދު ފަޒީނަށެވެ.
އަދި ރައީސް އިބްރާހީމް މުހައްމަދު ސޯލިހު މަޖިލީހަށް ނަންތައް ފޮނުއްވިއިރު އެންމެ އިސްކަން ދީފައިވާ ނަމަކީ މަޝްހޫރު ޕްރެޒެންޓަރު ޝިފްލާ އިބްރާހީމެވެ. ޝިފްލާގެ ނަން މިފަހަރުވެސް ކޮމެޓީން ވަނީ ކަޓުވާލައިފައެވެ. އެއަށްފަހު ކޮމެޓީން ފާސްކުރީ އަނާ އަދި ފަޒީންގެ ނަން ލިސްޓުގެ ކުރިޔަށް ލުމަށެވެ.
ބްރޯޑްކޮމްގައި މިހާރު ހުންނެވީ އެ ކޮމިޝަންގެ ރައީސް މަރިޔަމް ވަހީދާއާ ހަވީރު ނޫސް އަދި ރާއްޖެޓީވީގެ ނޫސްވެރިޔާ އަލީ ޔޫސުފްގެ އިތުރުން އަހުމަދު ގައިސްއެވެ.