ރާއްޖޭގައި ގަވައިދާ ހިލާފަށް އުޅެމުންދާ ބަންގްލަދޭޝްގެ އިތުރު 200 މީހަކު މިއަދު އަނބުރާ ގައުމަށް ފޮނުވާލައިފިއެވެ. މި 200 މީހުންނާއި އެކު މުޅި ޖުމްލަ 1800 ބަންގްލަދޭޝް މީހަކު ވަނީ އެމީހުންގެ ގައުމަށް އަނބުރާ ފޮނުވާލައިފައެވެ.
މި މީހުން ފޮނުވާލާފައިވަނީ ބަންގްލަދޭޝްގެ ވެރިރަށް ޑާކާ އަށް މިއަދު ދިޔަ މޯލްޑިވިއަންގެ ފްލައިޓެއްގައެވެ.
ގިނަ އަދަދެއްގެ ބިދޭސީންތަކެއް މިއަދު ވެސް ރާއްޖެއިން ފުރާފައިވާއިރު، ކޮވިޑް-19 ގެ ނުރައްކާ ރާއްޖޭގައި އެންމެ ބޮޑަށް ބޮޑުވެފައިވަނީ ވެސް ބިދޭސީންގެ މެދުގައެވެ. އެގޮތުން މިހާތަނަށް ރާއްޖެއިން 1872 މީހުން ޕޮޒިޓިވް ވެފައިވާއިރު އޭގެތެރެއިން 1255 މީހުންނަކީ ބިދޭސީންނެވެ.
ބިދޭސީންގެ ތެރެއިން އެންމެ ގިނަ އަދަދަކަށް މި ބައްޔަށް ރާއްޖެއިން ޕޮޒިޓިވް ވެފައިވަނީ ބަންގްލަދޭޝްގެ ރައްޔިތުންނެވެ. އެގޮތުން އެގައުމުގެ 1015 މީހަކު ވަނީ ޕޮޒިޓިވް ވެފައެވެ.